Ther u Rahul ia ka BJP ba synshar donbor bad ibein ia ki rit paid ha ri India

U Rahul Gandhi, MP ka party Indian National Congress (INC) bad u nongialam ba radbah ka party Congress u la ther tyngeh pyrshah ia ka jingsynshar bym hok bad ka jingpyndonkam ia ki buit treikam kiba bakla jong ka party Bharatiya Janata Party (BJP) kaba lamkhmat ia ka sorkar pdeng hapoh ka ri India kaba la ktah shikatdei ia ka hok longbriew man briew, ka jinglong laitluid ki paidbah nongshong shnong ka ri. U Rahul Gandhi, u nongialam ka party Congress ka ri India, u la sdang ia ka jingiaid lynti baroh kawei ka ri India ban pynphriang ia ka khubor halor ka jingdonkam ban iatylli, ka jinglaitluid ha ka jingngeit niam bad ka jingsynshar bahok kaba la tip kum ka Bharat Jado Nyay Yatra u la wanpoi pat sa ha Meghalaya ban wan ialap ia kane ka khubor hapoh ka madan Pahamsyiem ha Nongpoh Ri Bhoi District. La pdiang sngewbha ia u Rahul Gandhi, hashwa ba un rung sha Meghalaya na Jorabat da u MP ka jylla Meghalaya bad u nongialam ka Meghalaya Pradesh Congress Committee u Ma Vincent H Pala ha ryngkat kiwei kiwei ki heh nongialam ka party Congress ka jylla Meghalaya.

Hadien ba la poi ha Nongpoh, u Rahul Gandhi lem bad ka kynhun ki la mih ban iaid kjat kumba 1 kilometer ban poi sha ka madan Pahamsyiem ha kaba la pynbeit ban pynlong ia ka jingialang paidbah ba la wan ban shimbynta da ki hajar ngut ki paidbah nongshong shnong ka jylla Meghalaya bad Ri Bhoi District. Ha ka jingkren paidbah, u nongialam ka party Congress u la pynpaw, ba kum u nongialam paidbah ha ka ri, u la sdang ia kane ka jingiaid kjat da ki phew hajar kilometer kaba u la sdang naduh Kenyakumari terter sha Kashmir bad ban poi sha kiwei kiwei pat ki jylla ka long ba u thmu ban wanrah ia ka jingiaieid iatylli bad ban pynsngewthuh paidbah halor ka jingshah khniot bein ka jingsngew bad ka jingangnud jong u paidbah da ka sorkar India kaba la lamkhmat da ka party BJP kaba treilang bad ka kynhun jong ka RSS.  Kum u nongialam paidbah, u la ther tyngeh shwa ia ka jingsynshar donbor bad ka bym khuid da ka sorkar ba lamkhmat da ka party BJP bad ka jingniew shilliang ruh ia ka jingsngew jong u paidbah ka ri hi baroh kawei, kawei na ki nuksa kiba dang jia shen ka dei ka jingjia ia umsnam hapoh ka jylla Manipur ha kaba da ki spah tylli ki mynsiem briew ki la duh ei bad ka jingduh ruh ia ki jingdon jingem ha kane ka jylla hynrei kaba lyngngoh ka long ba u Myntri Rangbah Duh ka Ri u Narendra Modi bad u Myntri ka Tnad Pohing ka Ri u Amit Shah kim shem la leit jngoh ne pynsngew eiei halor kane ka jingjia umsnam.

U la ther tyngeh ruh, ba ka BJP ka treikam lang bad ka kynhun jong ka RSS kiba la wanrah ia shibun ki jingklumar bad ki jingjia kiba shyrkhei hapoh ka ri India ha kaba lah ban kdew ruh, ba ka thain shatei lam mihngi (North Eastern States) kiba kynthup ia ka Meghalaya, ka Manipur bad Arunachal ki dei ki jylla kiba la shah peitkhmat bha ha kine ki ar kynhun ban pyntroin ia ka jingsynshar ba laitluid jong ki paidbah bad khamtam ha ka jingngeit niam ka jong ki. “Haba phaikhmat ruh sha ka jylla Meghalaya, ka sorkar India ba lamkhmat da ka party BJP, kam shem la shu peit ibein bad sngap man man ia ki jingdonkam ha ka liang ka roi ka par khamtam ha kaba ia dei bad ka jingdawa jong kane ka jylla ban ioh ia ka jingithuh noh ia ka ktien Khasi bad Garo hapoh ka khyrnit kaba 8 jong ka riti synshar ka ri nalor kiwei kiwei ki mat jingdawa kiba ka jylla Meghalaya ka donkam hynrei la shu pynbiej jubor da kumne kumtai da ka party BJP”, pynpaw u Rahul Gandhi, da kaba pynkut ruh, ba un long kum u shipai jong ka ri bad ka jylla Meghalaya ban ieng satar ha ryngkat ka party Congress ha nongbah Delhi ban iakhun pyrshah bad ban kren ia ka jingeh jong ki paidbah kiba kynthup naduh ki jingeh jong ki nongrep, ki nongbylla bad kumjuh ruh ki samla khlem kam, kiba kynduh jingeh ha Meghalaya bad ka jingithuh ruh ia ki mar rep ba pynmih na kane ka jylla.