U nongialam ka National People Party (NPP) u ba dei u Myntri ha ka Sorkar MDA u Rakkam A Sangma, u la ther ia ki jingkren jong u MDC ka BJP na Tura u Bernard Marak. Ula ong ba ka jingiarap sha ki lanot ba shah ktah na ka jingshlei um bad ka jingtwa khyndew ha Rilum Garo ka la kylla politic, hadien ba u MDC ka BJP na Tura u la kynnoh ba ka jingiarap la ai tang sha kito kiba la kohnguh ban pyniasoh sha ka NPP. U Rakkam ula ong ba ki jingkynnoh jong u MDC ka Tura kidei tang ki jingkren khyllung khynnah bad kadei tang ban ialam bakla ia ki paidbah.
U Rakkam u la ong ba da kaba ai jingiarap ia ki lanot kam mut ba kidei ban kyrshan ia ka party bad bynrap ba ym dei ban ialeh politic ia kum kine ki kam, namar ka long kaba bym lah ban pdiang. U MLA ka Rongara Siju, u la ong ba ki jingiarap ba la ai sha ki lanot ka long khlem da khein party. “U Bernard u dei ban pyrkhat kum u parabriew shabar na ka party ba u don,”ula ong.
U la ong ba ym dei ban pynïakhleh ia ka jingiarap jong Sorkar bad ka NPP namar kidei la ka jong, ha kaba u la iathuh ba ka NPP ka la ai ki jingïarap da ki tiar ki tar bad ki marbam, bad wat ka Congress ka la ai ia ki jingiarap.
