U bah RM Shabong, uba dei u nongshong shnong jong ka Umniuh Tmar, Riwar Mihngi, ula thoh sha U Conrad K Sangma, myntri rangbah ka jylla, halor ka jingtuid ka khyndew sboh, kaba iai bteng na ka thain Riwar Mihngi sha Bangladesh bad katei ka la buh ia ka jingtyrkhong kaba jur sha ka thain bad kaba la pynduh pyndam lut ia ka rep ka riang sha ka thain, kaba wan rah ia ka jingnang khluit ka mariang bad nangta sa ka jingtyrkhong ka umbam umdih.
Ha katei ka dorkhas, utei u rangbah, ula sot ruh ia ka kaiphod jong ka Indian Institute of Technology, kaba la wad bniah da ki arngut ki stad, ba kynthup ia u Ravi Raj bad U Manabendra Saharia, ha kaba ki la pyni ruh ba ka East Khasi hills, ka dei ka jaka kaba ka jubor bha ha ka jingtuid noh ka khyndew bad kaba poi sha ka 164.52 million ton ha ka shisnem ha ka shi hectare ka jingdon ka khyndew bad katei ka dei ka dak jong ka jingma kaba khraw, katba kum katei ka kaiphod bad katei kan pyntwa ia ki iing ki sem, ia ki surok bad kiwei ki jingtei bad kan pynjulor jur ia ka rep ka riang.
U bah RM Shabong, u kyntu ia u myntri rangbah ka jylla, ba un iakren ia kane ka mat bad ka sorkar India, na ka bynta ban khanglad kyrkieh ia ka jingtuid noh ka khyndew sboh na ka thain.
Lah ban pynkynmaw, ba ha ki snem 1990, ka Riwar Mihngi Development Council (RMDC), ka la iakren bad ka sorkar Meghalaya, lyngba ka tnat Soil Conservation, na ka bynta ban thaw da ki kynroh ha ki bri ki bsah ban pynneh ia ka khyndew ha ka thain bad ha katei ka por, ka sorkar jylla, ka la mang pisa, na bynta kitei ki kynroh bri, hynrei kaba lyngngoh, ka long ba kam shym la poi satia shaei shaei ruh.
