Ki nongshong shnong ka Mawlumrum Diengiei mynta ka sngi ki la sngew sheptieng hadien ba ki la lap ia u tiar, uba la suba ba wan hap na suin bneng.
Une u tiar ba wan hap ym pat lah ban tip u dei u jait tiar na ka bynta kaei hynrei ha ka met une u tiar ka don ka jingthoh, Weathex WXR-301D bad ka kyrteng ka sorkar Indiq, Shillong, uba lah ban dei u kynja weather wireless sensor.
Katkum ka jingiathuh u Rangbah shnong ka Mawlumrum Diengiei, u bah Kyrmen Kharkhrang, une u tiar la lap ki briew ka shnong ha ka por 3baje eiei janmiet ha kawei ka jaka hajan shnong.
U Rangbah shnong ula ong ba haba shu peit, u lah ban dei u tiar uba thew suin bneng tangba ym tip thikna namar ba kim dei ki stad.
Halor kane kane ka jingjia, na ka liang ka shnong ka la pyntip sha ki pulit ba kin wan shimti namar ba ioh dei pynban uba don jingma ia ki briew.
Na ka liang kaa tnad thew suin bneng ka Meteorological Centre (IMD), Shillong, ka la ong ba u kynja tiar uba hap ha Mawlumrum, Diengiei u dei u radiosonde Instrument uba pynher man ka sngi ban shim jingthew ia ka jinglong ka suiñ bneng.
Ia une u tiar la lynher na IMD kaba don ha Meath Home, 3rd Mile, Upper Shillong.
