Ka Myntri ka tnat ka koit ka khiah ka Dr. Ampareen Lyngdoh ka la ong ba ka World Health Organization (WHO) ka dang pynlong ka jingtohkit halor ka jingsuba khie biang ka jingpang Polio ha Garo Hills kaba la tip kum ka ‘ Wild Polio’. Ka Dr Ampareen ka la ong ba ka sorkar jylla lyngba ka tnad ka koit ka khiah ka la shimkhia ia i khynnah iba la lap ba i ioh ia ka jingpang khyllah ka Wild Polio. “Ha ka jingsngewthuh jong nga kane ka jingpang ka kham pher hynrei ngi dei ban ailad shwa ba ka WHO kan tohkit halor ka jingpang kaba la tip kum ka Wild Polio,” ong ka Dr Ampareen haba kren sha ki lad pathai khubor mynta ka sngi. Ka Dr Ampareen kala iathuh ba la suba ba kane ka jingpang kadei Wild Polio bad ka long pher naka jingpang Polio kaba la duh jait ha baroh kawei ka Ri India.
“Ka Sorkar Jylla lyngba ka tnat ka koit ka khiah kala shimkhia bad kala buddien ia i khynnah ba suba ioh jingpang Wild Polio bad ngi ioh jingtip ba ine i khynnah mynta i don ha ka met ka ba koit ba khiah bad naka liang ka Sorkar Jylla ka dang ap iaki jingbthah naka WHO haba iadei bad ki sienjam ban shim halor kane,” ong ka Dr Ampareen. Ka la ong ba ka Sorkar Jylla kan ap ia ki bthah na ka WHO, la ka donkam ne em ban shna biang bad ban ai tika na ka bynta ka Wild Polio.
Hadien ki bun snem , la shem ia kane ka jingpang ba khyllah bad mynta dang hap ban wad bad tih bniah shwa. Ka Myntri ka tnat ka koit ka khiah ka la ong ba donkam ka jingpynshai halor ka jingpang khunlung khnang ba ki kmie ki kpa kin long phikir ia ka koit ka khiah ki khun. “La donkam ban pynlong daki program ialap bad pynshai paidbah, khamtam ki kmie ki kpa kin long ba kloi ban ai injek ia la ki khun bad ban weng ia ka jingartien.” kala ong.
