Ka Hima Sutnga Youth Federation (HSYF) ka la kynnoh ba ka kompeni Cosmos Cement Ltd kaba don ha ka shnong Umthe, ka la pynjot lut ia ki khlaw ka Elaka Sutnga bad ka la tih beain ruh ia ki shyiap ki maw ha katei ka jaka.
U President ka HSYF u bah Nangbha Nongtduh haba kren sha ki lad pathai khubor u la pynpaw ia ka jingsngewsih namar ba ka kompeni Cosmos cement Ltd ka la trei jubor wat hadien ba ka shnong ka la phah sangeh ia ka jingpyntrei.
U bah Nangbha ula ong ba ka jingpom pathar bad ka jingkhlong shyiap jubor da ka cosmos cement ltd ka la ktah ia ki lum ki wah bad kan buh jingma ruh ia ka imlang sahlang hadien habud.
Katkum ka jingong u bah Nangbah la ong ba na ka liang ka Elaka ka la pynlong ia ka dorbar ha ka 10 tarik Rymphang 2024 bad ka la shim rai ban phah pynsangeh noh ia katei ka kompeni hynrei ki nongpyniaid kane ka kompeni ki khlem sngap bad ki la iaid bad pyntrei jubor ia ka kam.
U President ka seng ula buh ka jingmaham ia ki nongpyniaid ka kompeni ba ki dei ban sangeh mardor ia ka kam.
Ha kajuh ka por, ula kyntu ia ki bor ba dei khmih ba kan peit bad shimkhia ban leh ia kaba donkam.
U Bah Nangbha ula kynnoh ruh ba ia ka kompeni Cosmos Cement Ltd, la ai jingbit da u Acting Doloi ban pyntrei ha kane ka khlaw.
