Trei u Khawiang, sha riat hap u briew ha Jowai

Uwei u briew bala shoh khawiang ula ur shapoh kawei ka riat ba don ha Wahgate Jowai bad donbok namar ba u sahkut noh shiteng riat ki briew ba iohi kila ioh ban iarap pyllait im ia u. Katkum ka jingiathuh kiba iarap pyllait im ia u ki ong ba katba ki dang iaid lynti na katei ka jaka uwei u driver ba niah kali ula pyrta iaki ba u iohi ia u briew ba ur shapoh riat, kumta maki ruh kila khmied shapoh riat bad iohi ba u neh ha shiteng, kumta mar mar kila ialeh ban hiar ai jingiarap ia u khnang ba un ym hap shatrai duh jongka riat bad ruh ba un lait na kano kano ka jingjia ba sngewsih.

Bad namar ba ula shoh khawiang ki nongiarap kila teh da u tyllai iaka met jong u bad tan suki suki, ha kajuh ka por  ki arngut ba hiar shapoh ruh kila ialeh katba lah ban tan bad ñiat ia u haduh ba un poi shalor surok.

Kum ban pynkynmaw ha kane ka juh ka jaka  ha u bnai September jong u snem 2023 la don ka jinghap kawei ka trok  shaduh trai jong kane ka riat haduh ba ka trok kala pra lyngkhot lyngkhai bad  u nongniah ruh ula khlad hashen.