Ka Khun Hynniewtrep National Awakening Movement (KHNAM) ka pynpaw ia ka jingbynniaw halor ka jingbym shimkhia ka Khasi Hills Autonomous District Council (KHADC) pyrshah ia u bar jylla ba ioh kam Kontrak ha North Eastern Regional Institute of Health and Medical Sciences (NEIGRIHMS) khlem da don ia ka Trading License.
Katkum ka kyrwoh na u Working President ka KHNAM u Bah Thomas Passah ula ong, “Ka seng ka la ujor pyrshah ia uwei u bar Jylla uba kyrteng u Singhania halor ka jingioh kontrak ha NEIGHRMS, khlem ka jingdon ia ka Trading License kaba biang. Ngi pynpaw ka jingsngewsih halor ka jingbymlah jong ka Council ban pyndonkam ia ki bniat ka Regulation ban weng ia utei u bar Jylla na katei ka kontrak kaba ula ioh”.
U Bah Thomas Passah ula pynpaw ba katei ka pyni ia ka jingtlot ka rukom treikam ka Council kaba pynshlur pat ia kiwei ban iaid pyrshah ia ki kyndon ka Council ha ki por ban wan bad ka seng ka sheptieng ba kat ban da shimkhia ka KHADC, katei ka kam kontrak kaba la ioh da utei u bar jylla kan sa kut hi noh.
“Ka seng kala ioh ia ka khubor ba une u bar jylla u don tang kawei ka Trade License ia kaba u pyndonkam ban trei bun jait ki kam khaii kaba long pyrshah ia ka Regulation jong ka Council. Ha kaba ia dei bad ka NEIGRHMS ruh ula pyndonkam da ka License ban suplai tiar ban trei pat ia ka kam ka bym iahap bad ka license kaba u don” la ong u Working President ka KHNAM.
