Ha kawei ka jingjia twa khyndew ba shyrkhei kawei ka longiing ka la lait thaw na ki jingjia ba sngewsih hadien ba ka khyndew ba twa kynsan na uwei u lum ka la ban ia kawei ka dukan bad ka iing ba don harud surok bah National Highway 06 ha ka shnong Shangbangla, Ri Bhoi District. La iathuh kane ka jingjia twa lum ka la jia hynnin ha ka por 8 baje eiei mynmiet ha kaba la don ka jingther u lapbah bajur ba neh kumba lai kynta eiei, tad haduh ba la pynshong synjor ia ka khyndew ha ki lum kiba don harud u surok bah.
Ha katei ka jingjia twa lum ha ka shnong Shangbangla, ha kaba ka khyndew ka la ioh ban ia kawei ka dukan bad ka iing briew, hynrei donbok ba lai ngut ki mynsiem briew ki la lait thaw na ki jingjia kaba sngewsih kaba kynthup ia u kpa ka iing u Bah Teiborlang Wahlang, ka kurim jong u bad ka khun jong ki, hynrei kane ka longiing ka la mad pat ia ka jingduhnong kaba khraw naka jingjulor na ka jingshah ban ha ka khyndew. Ka jingduhnong kaba khraw kaba kane ka longiing ka la mad, ka kynthup naduh ka jingjulor ki tiar ki tar ka iing, ki soh ki pai bad kiwei kiwei ki mar ba la buh ha kane ka dukan kaba la julor.
Na ka liang u Bah B. Lawriniang, Rangbah Shnong ka Shangbangla, u la iathuh, ba kum ka Dorbar Shnong hi ka don ia ka jingsngewkhia kaba jur halor kane ka jingjia, hynrei la pynpaw pat, ba donbok ba ha kane ka jingjia kam shem la don satia kano kano ka jingjia kaba sngewsih lait noh ka jingjulor jong ka dukan, ka iing bad ki tiar ki tar. “Ha kane ka shnong ki don kumba 20 tam ki longiing kiba shong sah hapdeng ka jingsyier namar ka jinglong jingman jong ka jingsynjor ki lum ki wah kiba don hajan kine ki longiing, kumta ka Dorbar Shnong ka la kyntu ia kine ki longiing ban phikir bha ha ka por ba don ka jinghap slap kaba neh da ki kynta bad ruh ha kajuh ka por ka Dorbar Shnong Shangbangla ka la kyrpad ruh ia ki bor ka sorkar ban shim da kino kino ki lad ban ai jingiada ia kum kine longiing ban iada na kino kino ki jingjia ba sngewsih.
