Ka Dorbar shnong New-Nongstoin ka la pynlong ia ka rynsan ialap election paidbah ban ai lad ia ki seng sain pyrthei bapher bapher ba kin kiew ha rynsan ban pyni la ki nia ki jutang bad ki nongrim ba ki ieng hashwa ba ki paidbah kin leit ban jied ia u MP sha ka Dorbar Lok Sabha ha Parliament, ka ban sa long ha ka 19 tarik mynta u bnai. Haba kren ha ka jingialang rynsan paidbah ha Nongstoin Market Complex, na ka liang u kyrtong ka Regional Democratic Party (RDA) u Bah Robertjune Kharjahrin ula ong ba dei na Nongstoin ba la saindur ia ka rukom pyrkhar ban synshar da lade ialade, kata naduh ka por jong u Syiem khynnah ka Hima Nongstoin u Paiem Wickliff Syiem uba la kwah ban ioh noh la ka jong ka jingsynshar bad na ka liang jong ka RDA ruh ka kwah ia kane kajuh ka nongrim ban wanrah biang ka ka jingsynshar dalade ialade, ym ban shah synshar ha ki briew ba nabar. U Bah Robertjune u la pynkynmaw ruh ia ki nongrim jong ka RDA bad ki issue ia kaba ka party kan shim na ka bynta ka jaitbynriew kum ka jingdawa pynurlong ia ka ILP, ka jingpynrung ia ka ktien khasi ha ka 8th schedule jong ka Riti Synshar ka Ri, ka mat pynbeit pud bad kiwei kiwei de. Kiwei pat ki nongkren ki kynthup ia u Bah KP Pangniang president HSPDP bad bah Metbah Lyngdoh President UDP.
Katba na ka liang ka NPP lyngba u Bah Pyniaidsing Syiem, CEM ka KHADC u la thalain tyngeh ia ka VPP da kaba ong ba kita ki briew ba wan kam ba ki dei kiba ieit bad kiba ieng iada ia ka jaitbynriew, hynrei ha ka por ba ki la long MLA bad ha ka por ba la long CEM jong ka KHADC, kiei kita ki ain kiba ula shna ne wanrah na ka bynta ban iada ia ka jaitbynriew. U la ong ba kine mynta ki la sdang ban ialam bakla ia ki samla da kaba pynlong ia ki jingiakhih pyrshah sorkar kynthup ia ka jingiakhih Reservation Policy bad u la buh jingkylli ruh ba katno ngut ki samla ki la ioh kam hadien ka jingiakhih jong ka VPP. U la ong ba ka jingiakhih jong ka VPP halor ka Reservation policy ka la pynduhnong ia ki Khasi bad ka la pynmyntoi pynban ia ia kiwei pat ki jaitbynriew bad u la suba ba imat kane ka jingiakhih Reservation policy ka dei kaba la phah da u Dr. Mukul Sangma bad lehse dei u Dr. Mukul uba la pynpharia ia ka jaitbynriew jong ngi. U Bah Prestone Tynsong pat u la ong ba ka jingpyntriem, jingpynsngewthuh bakla, ki jur bha ha kine ki sngi da kaba ong ba ka jingkyrshan ia ka NPP ka dei ka jingpynkhlain ia ka BJP bad kiba bun ki la sngew dei bad wat ma u ruh u sngewmat ba ka la dei, hynrei u la pynshai pat ba ka NPP bad ka BJP kim iathiah lang, hynrei ban iatrei ia ka kam ka roi ka par te kin iatrei beit.
U la ban jur ruh ba ka nongrim jong ka party NPP ka long ban ai ka jingiada ban pynnneh pynsah ia ki riti dustur, ia ka niam ka rukom bad ka rukom bam rukom dih jong ki jaitbynriew rit paid ym tang ha Meghalaya hynrei ha ka Ri hi baroh kawei. Ula buh jingkylli ruh ia ka party VPP kaba kam ba ka ieit jaitbynriew ba kan pyni katno inshi ka surok phi la shna ha Nongstoin bad katno tylli ki iing na ka bynta kiba duk phi la ai? U la ong ba haba ieit jaitbynriew sdang shwa na la rympei bad ban iada ban pynneh pynsah ia la ka iing ka sem bad ka kur ka jait lajong hynrei ym ban iaknieh sa ia ka jait ka khong. Ha katei ka sngi la ioh ruh ia ka jingkren na u Bah Macmillan Byrsat uba la pynshai ia kaei kaba ka sorkar NPP ka la leh ha kine ki snem ba u la ioh ban long u MLA. ïa ka INC pat la mihkhmat da u MLA ka Nongstoin u Bah Gabriel Wahlang, Bah Charles Marngar, MLA Mawhati bad bah Mansturdy Nongrem, MDC barim ka Ranikor Constituency. Na ka liang u Bah Charles Marngar u la ban jur halor ka jingshah pyndik ki khristan ha kylleng ka Ri naduh ba synshar ka BJP, ka jingshah pyrkhing ban buh ia ka dur Jisu ha ki skul bad jaka mane Blei, ka jingshah leh bein ki phadar, sister, pastor bad ki nongialam niam ha kylleng ka ri bad ka jingpyrkhing ban duwai na ka bynta kiba pang ba shitom.
U Bah Marngar u la ong ba ka NPP ka dei kajuh bad ka BJP bad u Myntri Rangbah ka jylla u Conrad Sangma ruh u la pynthikna ha ka jingialang ha Jhalupara ban phah thep ia u Modi da kaba nion ha ka dur jong ka kot. U la kren ruh halor ka Uniform Civil Code (UCC), ka kam pynbeit pud bad ka jingpynthikna ban ai laitluid ia baroh ki nongshong shnong ba kin im kin iaid ha la kajong kajong ka rukom im lada ki ailad biang ia u Bah Vincent Pala ban jop ha kane ka MP election. Karba na ka liang u Bah Gabriel Wahlang u la tyrwa sha ki paidbah ba kumba ki la pynjop don burom ia u ha kane ka election MLA ba la dep, mynta ruh to ai biang ia kajuh ka sur ban pynjop don burom ia u Bah Vincent Pala na kane ka Constituency. U la ban jur ba ia mynta, ym pat ioh ia ka MLA scheme bad u la pynthikna ban pynpoi hok ia ki scheme sha ki paidbah ynda u la ioh pdiang.
+ There are no comments
Add yours