U Jitendra Dkhar uba dei u Co-founder & Managing Director ka Blind Lead Trust Organisation, hynne ka sngi haba shim bynta haka jingrakhe iaka sngi ba kyrpang ki briew ba duna dkhot met bor iohi ki khmat (visually impaired) kaba tip kum ka World White Cane Safety Day ba pyniaid daka Epatha Society ha Moowakhu Dkhiah West, East Jaiñtia Hills District u ong, u Diengduh Lieh u pynithuh iaka jinglong kyrpang jong ki kum kita ki briew bym lah iohi ki khmat, bad u long ruh u paralok ba ki shaniah tam ba kim dei ban duh namar kat shaba leit ki donkam ia u. Ha ka jingiaid lynti jong u, u lap ba don shibun ki jingdkhot naka bynta ban pynbit pynbiang ne iarap iaki kum ki briew ba duna dkhot met, la haba iadei bad ka lad pule puthi, ka lad iohkam iohkam, lad kamai kajih, ka bai leit bai wan, ki lad jingiarap haki lynti syngkieng bad kiwei. Kane ka jingdkhot u ong kam dei tang naka liang ka sorkar hynrei naki riew paidbah kumjuh.U ong ruh ba lada phi kheiñ iangi kum kita ki nongshong shnong bapura ka Ri kiba la kha lang ha kane ka Ri bad ka thaiñ daki kmie tymmen kpa tymmen, sngew iangi ruh kum ki khun ki kti ki hymmen para jong phi, ai ka kti jong phi bad ngin bat bad tan iangi shalor khnang ba ngi ruh ngin ioh bynta lang haki laiñ bapher bapher.
Ha kane ka sngi u Jitendra Dkhar u kyntu ruh ban burom iaki briew bym lah iohi ki khmat haki surok lynti syngkieng, bad kane ka jingkyntu jong u ka long kyrpang eh ia kiba ñiah kali ba kin sngewbha ban phikir bad peit bha namar bunsien juh jia ka jingshah tynrah ki paralok jong u, shah iuh ki Diengduh jong ki haki kali. Haba iadei bad kane u ong, haba phi iuh ia u Diengduh jong ki long kumba phi phut iaki khmat jong ngi, da kaba u ai nuksa ruh kumno phin sngew lada shah khlong noh tang kawei ka khmat jong phi kiba iohi. Kumta u kyntu ba lada iaki briew ba kum maki sha lynti dei ban kylli la ki donkam jingiarap ne em, nalor ban pynithuh ialade ym ban kren beiñ ne ñiewbeiñ. Ha kane ka jingrakhe iaka sngi ba kyrpang ki briew ba duna dkhot met bor iohi ki khmat (visually impaired) la donlang ruh u Aditya Verma IAS, SDO Khliehriat kum u kongsan uba la kren ai mynsiem ia kine kiba duna bor iohi ki khmat, kumjuh ruh iaka Epatha Society kaba dei ka society ba peit kyrpang naka bynta ka jingdonkam ki briew ba don jingduna haki dkhot met.
Nangta u Rev. E.S Saphooh Co-founder uba dei ruh u Managing Director ka Epatha Society, u Kermiki Siangshai Members Society uba la ai ruh ka jingbatai pynshai haba iadei bad kane ka society kumjuh ruh ki bynta ba ka juh iarap ia kiba don jingduna dkhot met. U Kermiki Siangshai u ong lyngba kane ka society ki ai ka jinghikai sur bad thaiñ khlem jingsiew naka bynta kiba duna dkhot met ha ryngkat ka bai kali, katba naka bynta kito ki briew ba dap ba biang pat la shim daka pisa. Kaba mut ka pisa ba shim naki briew ba dap ba biang ba wan shah hikai la pyniaid shaka bai kali naka bynta kiba duna dkhot, ban siew iaki nonghikai bad ruh ban thied iaki tiar ki tar.
