Ki nongrep na ka shnong Mawlali kaba hap hapoh ka Mawkynrew konstitwensi, ki la pynpaw ia ka jingbynniaw namar ba katba ki nangrep ki nang syrdep bad kam don kano ka jingioh nong. Haba kren sha ki katto katne ki nongthoh khubor, kine ki nongrep ki la ong ba ka kam rep kam lah ban pynriewspah ia ki namar bun ki jingeh bad la shu rep tang ban ioh ia ka ja mluh. Na kane ka thain, ki nongrep ki ju rep jhur kum u kubi, u phan bad u sohsaw nalor kiwei de. Ki la pynpaw ba kaba ktah eh ia ki ka dei halor ka jingrit ka dor ka mur jong ki marrep bad kam iahap shuh bad ka rukom trei pynmih umsyep jong ki. Ha ka shisnem ki rep kubi lai sien bad don kiba lah ban pynmih ka long katkum ka jinglah ban rep bad ka jingbha ka mariang, watla ki hap ban thied sboh da ki phew hajar ban ai sboh ia u jhur.
Ki la ong ba nalor ka jingshim wai ia ki jaka rep, ki hap ban thied ia ka sboh, ki symbai, bad tang shu leh sat ka mariang, ka jingkhmih lynti jong ki, ka la pulom lut namar ba ki dang hap ban shaniah ha ka bor jong ka mariang. Nalor ka jinghiran ha ka ioh ka kot, ki la mad ruh ia ka jingeh na ka jingkyrduh um ha kaba ki hap ban ap um ban pyndap wat haduh shiteng miet ruh. Halor ka jingkyrshan bad ka jinghikai na ki tnad sorkar, kine ki nongrep kila ong ba kim ju ioh eiei bad lada don ruh kam long kaba larkam than.
Ki la ong ba u MLA ka thain ruh hadien ba u la jop, um patiaw ia ki nongrep watla ula long myntri ba dei peit ia kane ka kam bad u peit tang ia ka kam ialehkai. Na ka liang u bah Comfree Rajee uba dei uwei na ki nongialam ha ka seng nongrep, u la pynpaw ia ka jingsngew khia ia ka jingkynduh mawsiang ki nongrep, bad u la kyntu ba ka sorkar ka dei ban don ka polisi kaba khlain bad kaba larkam halor ka rep ka riang, namar ba kumba ka long haduh mynta, ka kam rep ka dei ka bym thikna bad ka bym shngain ia ki nongrep namar ba ki hap ban shaniah ha ka bor mariang bad lada sniew ka mariang, ka jingtrei shitom jong ki ka la sepei lut.
