U MLA ka BJP u bah Alexander Hek ula ong ba ka party ka la dep iakren ia ka jingeh ki samla pule ka NEHU bad ia mynta ki dang ap ia ka jubab na ka sorkar pdeng. Haba kren sha ki lad pathai khubor u bah Hek ula ong u la dep iakren bad ki nongialam ki heh ka party ha Delhi bad kin sa shimkhia ia kane ka jingeh ki samla pule. Ula ong ba um pat ioh iakren markhmat ia u Myntri ka tnad pule puthi ka sorkar India hynrei ula iakren bad u nongialam ba rangbah ka BJP ha Delhi.
“Ha kane ka taiew ba la dep, ngi la phah ia ka shithi sha u myntri ka tnad pule puthi ka sorkar India bad ngi dang ap ia ka jubab halor kane ka jingjia ha NEHU,” ong u bah Hek. U bah Hek ula ong ba katkum ka jingsngewthuh jong u ban pynbeit ia ki kynrum kynram ha ka skulbah NEHU, u Vice Chacellor ka NEHU u Prof. Prabha Shukla Shankar u la dei ban iehnoh ia ka kam. “Ha ka jingsngewthuh jong nga ka lynti ban pynbeit ia ka jingeh ha NEHU ka long ba u VC u dei ban risain ne ban bujli noh ia u lada ka don ka lynti wat la ka shong ha ka jingbishar ka sorkar pdeng,” ong u bah Hek..
U la ong ba ka sorkar ka dei ban pyrkhat ha baroh ki liang, na bynta ka jingbha ka jylla bad ka thain shatei lammihngi ka India. Lah ban kdew ba ki samla pule ka NEHU ki la pynlong ia ka jingiakhih shah thngan kaba la iaid sha ka 6 sngi hadien ba u VC ula pyneh ia ka jingdawa ban weng noh ia u Registrar bad Deputy Registrar ka NEHU.
