Da ka jingsngewkhia halor ka jingsdang ban jot rathai biang u surok ba pyniasoh na u surok bah National Highway 06 na Umling shaduh Lad Umrit bad Patharkhmah, mynta ka sngi ki nongialam ka HYC Ri Bhoi Sepngi, ki la leit ban buh da ka shithi ban ujor halor ka jingiaid ki kali ba kit palat pud ha u Executive Engineer ka tnad PWD ha Nongpoh. Ki nongialam ka HYC, ba kynthup ia u Bah RC Thangkhiew President bad u Bah P Kharsyntiew, General Secretary, ki la iathuh, ba ka seng ka la lap ba u surok ba pyniasoh naduh Lad Umdu shaduh Lad Umrit sha Patharkhmah u la jot biang ha kiba bun tylli ki bynta tang na ka daw ka jingioh iaid laitlan ki kali kiba kit palat ia ka 9 ton.
Ki la iathuh ruh, ba u ne u surok u dei u ba kongsan bha ba pyniasoh na u surok National Highway 06 sha ka thain Ri Bhoi Sepngi, hynrei kumba long mynta ki paidbah kin sa mad jingeh ha ka leit ka wan lada ym tehlakam ia ka jingiaid ki kali kiba kit mar khia bad palat na u ne u surok u ba long ruh tang u surok u ba rit bad bym shan lada iaid ki kali kit khia. Shuh shuh ruh, ki la kdew, ba ka jingioh ban iaid ki kali kit khia kan buh jingma shikatdei ruh ia ka jingkieng Lailad kaba la tor mynta la bun bun snem bad kan jia aiu lada kane ka jingkieng ka kdiah shiteng por, buh jingkylli ki nongialam ka HYC Ri Bhoi Sepngi.
Halor kane ka jinglong jingman jong u surok bad ka jingkieng Lailad, ka HYC ka la dawa na u EE ka tnad PWD ban shimkhia mardor bad ruh la buh jingkyrpad na u Deputy Commissioner ka Ri Bhoi District lem bad u SDO ka Patharkhmah Civil Sub Division ban phaikhmat ban shim ia ki lad kiba tyngeh.
