Da ka jingsngewdiaw kaba khraw halor ka jingieh noh da u Kontraktor ban tei pyndep ia u surok PMGSY ba 5 kilometre na Pahammawlein sha Sakhoikuna kaba la buh jingeh ia ka leit ka wan ki paidbah, ha ka sngi palei ki nongialam ka Joint Action Committee (JAC) Umdap areas ki la leit ban ujor halor kane sha u Executive Engineer ka tnad PWD ha Nongpoh Division. Kum ban kdew, u ne u surok na Pahammawlein shaduh Shakoikuna u long u kongsan bha na bynta ki paidbah nongleit nongwan kiba shong basah ha ka shnong Umdap Rngi, Umdap Dimu, Pahamsohbar, Umjong, Khongwing bad Shakoikuna ki pyndonkam ia ka u ba pyniasoh ruh sha Marmain bad shaduh Byrnihat.
Ki dkhot jong ka JAC Umdap Area kiba la ialam da u Chairman, Lawrence Nongrum bad kiwei ki Rangbah Shnong ki la iakynduh ia u M. Pyrbot, u Executive Engineer (EE) jong ka PWD Roads ha Nongpoh Division ban dawa shimkhia ban kyntu ia u Kontraktor ban tei pyndep ia u tei u surok naduh Pahammawlein 20mer shaduh Shakoikuna kaba la ktah ia ki nongshong shnong khamtam eh ki nongrep bad ki khynnah pule. Ha ka jingiakren, ka JAC ka la pynpaw ba ka jingtei jong katei ka surok kaba la ai mang lyngba ka PMGSY (ka skhim surok nongkyndong) la ai ia uwei u Sunshine Sawkmie, uba la iehnoh ia katei ka kam shna surok noh shuwa ban pyndep ia ka.
U Lawrence Nongrum u la iathuh, ba ka JAC ka pyrshah jur halor ka rukom treikam jong utei u Kontraktor u ba la shu iehnoh khongreng khlem trei pyndep ia u ne u surok u ba la shu tih tang ia ka rong kaba rim bad pynsyrtok pat ia ka leit ka wan ki paidbah, na ka liang ka JAC Umdap areas ka la aipor shitaiew ia u Kontraktor ban sdang trei noh ia u ne u surok lem kumta ka JAC kan shim da ka sienjam kaba tyngeh. Ka Kong T. Nongshli kaba la mihkhmat na ka kynhun ki longkmie, ka la ong ba ki nongshong shnong kiba la mad jingeh shikatdei halor kane ka jingshah iehnoh khlem pyndep ia u ne u surok PMGSY ba 5 kilometer, ka la bynrap ruh, ba lada u ta u Kontraktor um lah ban trei kumba la bthah balei um aiti noh ia kiwei ban trei pyndep ia u tei u surok.
