Ka Jaiñtia National Council (JNC) Jalaphet Circle hynne ka sngi ka la ujor sha ka Asst. Commissioner of Food Safety, East Jaiñtia Hills District pyrshah ia ki nongdie dukan kiba shong dukan hapoh u pud u sam ka shnong Jalaphet.Kane ka jingujor kadei halor ka jingkynnoh ba ki dukan kila dei ia ki mar bam mar dih kiba la palat por (Expiry Date). Ia kane ka sienjam ka JNC ka la shim hadien ba lah ioh ia ki jingujor na ki nongshong shnong ka shnong bad ka thaiñ ba bun naki dukan ki pyndonkam bad die daki mar ba palat por (Expiry Date) ka ban wanrah iaka jingktah haka koit ka khiah. Ka JNC hapoh ka jingialam da u President u samla Andy Bareh bad u General Secretary u Giken Langstang kala ai da ka dorkhas haka Asst. Commissioner ka Food Safety ka Ayesha B Tyngkan.
Haka Dorkhas ka JNC kala pynpaw ba kum ka shnong kaba dang duna haka stad ka tip ka long kaba ma eh iaki nongshong shnong namar kim da nang bha ban peit ne pule bha iaki mar kiba la palat ka por (Expiry Date) bad kane kan wanrah ym tang ka jingduhnong haka pisa tyngka hynrei ruh ka jingma kaba khraw haka koit ka khiah khamtam iaki khynnah bad kiba la noh ka rta.“Naka por sha ka por ka ju don ka jingpeitngor bad ka jingmaham naka seng bad naka shnong ruh kumjuh hynrei kine ki jait kam ki iai jia shi iai jia bad kane hi ka pynbitar iaka seng bad ka pynsniewdur ruh iaka imlang ka sahlang, ki mar bala kut por ym tang ki ktah iaka khuid ka suba ka shnong hynrei ki pynkha ruh iaki jait jingpang ba bun jait namar ka jingbret pathar bad pyntreikam iakum kine ki mar ka lah ban ialam sha ka jingma haka liang ka koit ka khiah ki nongshong shnong” la ong Andy Bareh.
Ka seng ka kyntu iaka Commissioner ban shimkhia iakane ka kam bad ban leh ruh da kaba tyngeh ia kine ki dukan kat kum ka aiñ bad ka kyntu ruh iaka tnad ban leit jurip ia kine ki jaka man laka por bad ban leit khynra ruh iaki jaka buh mar mata (Godown) khnang ban lap iaka jingshisha, ba lada lap ia kino kino kiba leh iakum kine ki jaitkam dei ban pynshitom jur iaki. Naka liang ka commissioner kala kular ban shimkhia iakane ka kam bad kan sa leh ruh iaka ba dei hok ban leh khnang bakan nym don kano kano ka jingktah ne ka jingduhnong iaki nongshong shnong bad kala kular ruh ban pynshitom iakino kino kiba leh iakum katei ka kam kaba wanrah iaka jingbym shngain haka koit ka khiah.
