Ka Khun Hynniewtrep National Awakening Movement (KHNAM) hynne ka sngi Balang ka la phah dorkhas sha u Chief Executive Member ka KHADC u Bah Pyniaid Syiem ban tuklar mardor ia ka jingaikam kontrak ka Indian Council of Agricultural Research (ICAR), Umiam ia kawei ka kompani ba nabar jylla kaba long ka jingpynkhein pyllein pyllein ia ka Trading by Non-Tribal Regulation 1954.
Ha ka dorkhas kaba la phah da u Working President ka KHNAM u Bah Thomas Passah ula pyntip ba kala don ka jingpynkheiñ ia ka Trading by Non-Tribal Regulation 1954 da ka ICAR, kaba la khot ia ka Tender na ka bynta ban buh ia ki nongpahara bad ka ICAR kala pynkhamti ia katei ka kam sha kawei ka kompani kaba la long trai da u Bar Jylla u bym shim la don satia iaka Trading License na ka KHADC.
“Katei ka kompani kaba la ioh ia ka kam kadei ka HRD Commercial & Industrial Security Force Pvt Ltd kaba ka ophis treikam ka jongka ka don ha Karimganj, Assam. Ka ICAR kala bthah ia katei ka kompani ban ai iaka Trading License hynrei ha kajuh ka por kala bthah ia katei ka kompani ba kan sdang noh ia ka kam kontrak ka jongka bad kane kadei ka jingpynkheiñ ia ka Trading by Non-Tribal Regulation 1954” la pynpaw u Working President ka KHNAM.
U Bah Passah ula ong, ha ka para 3 (1) jong ka Regulation la kdew shai ba ym shah ia uno uno u briew lait noh tang ia u riewlum uba dei u nongshong shnong jong ka District uba lah ban trei ne leh ia ka kam khaii pateng hapoh u pud jongka KHADC lait noh tang lada ai ia ka Lisen na ka bynta ka jongki bad ula bynrap ba katei ka pyni shai kdar ba ki bar jylla kim lah ban trei ne khaii hapoh u pud u sam jongka KHADC khlem ka Trading License kaba biang, kumta ka jingai iaka kontrak da ka ICAR bad ka jingailad ia u kontraktor ban ai iaka Trading License ha ryngkat bad ka jingioh ban sdang noh mardor ia ka kam ka long kaba be-aiñ bad ka jingpynkheiñ ia katei ka Regulation.
U Nongialam ka KHNAM ula ong ba ka jingai iaka kam kontrak ia u bar jylla haba don u trai jylla uba lah ban leh ia ka kam kiba la thep ia ka Tender kadei ka jingpynkheiñ ia ka 3A(b) jong ka Regulation.
“Katei ka kompani kam don satia ia ka ophis treikam ka jongka ha ka jylla Meghalaya bad kala ialam bakla ia ka ICAR da kaba kam ba ka don ia ka ophis treikam ha Khanapara. Kumta kane ka kompani kan wan ban pan ia ka lisen na ka KHADC hadien ba kan ioh ia ka NOC na ka dorbar shnong. Ngi kwah ban pynpaw ba wat ki Dorbar Shnong ruh kidei ban bud ryntih ia ki kyndon jong katei ka Regulation hashwa ba kin ai ia kano kano ka NOC. Ngi kyntu ia ka KHADC ba kam dei ban ai Trading License ia utei u riewshimet ne kompani ubala pynkhein ia ki kyndon jong ka Regulation 1954, Rules2019 bad ngi kyrpad ia phi ban bthah ruh ia ki bor jongka ICAR bad ban pynbor ia ka ba ym dei ban shah ia kino kino ki bar jylla ba kin sdang ia kano kano ka khaii pateng khlem da ioh shwa ia ka Trading License kaba treikam” la pynpaw u Nongialam ka KHNAM.
