Ka Khasi Students Union, East Jaintia Hills District mynta ka sngi ka la phah ka jingujor sha u Deputy Commissioner ban pynpaw ia ka jing pyrshah halor ka jingbym pynmih ki kharkhana pynmih dew bilat ki khubor thep kam ha ki Lad pathai khubor.Ka seng ka dawa na u DC bad la kyntu ba ki dei ban tuklar ia kane ka kam bad kim dei ban iaid lait ban pynmih ia kano kano ka kam ha ki lad pathai khubor ka jylla.
Ha ka kyrwoh ba la phah ka seng ka la ong ba ki don bun ki kam kiba lait ha kine ki kharkhana hynrei la pyllait tang sha kiwei pat ki kot khubor sha kiwei pat ka jylla kum sha Bihar, Assam bad kiwei kiwei. “Kane ka jingleh jong kine ki kharkhana ka pynbitar bad ka pyni ba kim burom bad khein snep satia ia ki trai ri ha ka liang ka ioh kam ioh jam,” ong ka seng.
Ka seng ka la ong ba kane ka jingleh jong kine ki kharkhana pynmih dew bilat ba don ha ka thaiñ East Jaintia hills district, ka pyni shai ba ki kwah tang ban kjit ia ka spah mariang khlem da sngewlem ia ki samla ka jylla.Katkum ka jingong ka seng ha ka kyrwoh, la ong “ U DC u la kular ba un ai da ka jingthoh sha baroh ki cement plant ba don hapoh district ban ia kren ia kane ka kam.”
