Ka Joint Military Exercise SHAKTI hapdeng ki shipai ka Ri India bad ka France ha ka sien ba hynniew ka la sdang hynne ka sngi bad kan kut ha ka 26 tarik mynta u bnai bad ia kane ka jinghikai pyntbit ki shipai la pynlong ha ka ktem shipai ha Umroi, Ri Bhoi District. Ha ka jingpsdang ia ka Joint Exercise la wan ban sakhi lang da u Nongkit Tiensyiem ne Ambassador ka ri France sha India u Thierry Mathou, u General Officer Commanding 51 Sub Area u Major General Prasanna Sudhakar Joshi bad kiwei ki heh shipai na kitei ki ar tylli ki Ri.
Ka kynhun ka ri India ba kynthup 90 ngut ki shipai la mihkhmat na ka RAJPUT Regiment bad na kiwei pat ki tnat shipai katba ka kynhun na Ri France ba kynthup 90 ngut ki shipai ha kaba bun ki dei na ka 13th Foreign Legion Half- Brigade (13th DBLE) bad la donlang ki nongpeit pyrman na ka Indian Navy bad ka Indian Air Force ban ai jinghikai.
Ka jingthmu jong kane ka Joint Exercise ka long ban kyntiew ia ka rukom pyntbit ia ki shipai na baroh ar tylli ki Ri, halor ki kam khynra bad ban pyndep ia ka Chapter VII kumba la pynkup bor da ka United Nations bad ban pynleit jingmut ha kaba ia dei bad ki kam khynra ha ki jaka khapsor bad ha ki jaka lum bad ban pyndep ia ka thong ban don ha ka kyrdan baheh bad ka jingdon ka met ka phad ba khlainban pyntbit ha ka jingleh Drill na ka jinghikai lang ha ka jingkhynra bad ban iasam mar kylliang ia ki buit bad ia ki jingnang jingtip. Kane ka Joint Exercise ka dei ka jinghikai pyntbit mar kylliang hapoh ka ri India bad ha ri France bad ka sien ba khatduh la pynlong ia ka jinghikai ka dei ha u Naiwieng, 2021 bad la khmih lynti ruh kan don ka jingiadei ba iajan hapdeng ki shipai ka ri India bad France.
