Ka Ministry of Culture ka Sorkar India lyngba ka Sangeet Natak Akademi, New Delhi (National Academy of Music Dance and Drama) kaba dei ruh ka Autonomous Body jong ka Ministry of Culture, ka sorkar India ryngkat ka jingiatreilang ka Navodaya Vidyalaya Samiti, kaba dei ka Autonomous Body ba hap hapoh ka Ministry jong ka tnat pule puthi ka sorkar India ka la pynlong ia ka “Kala Dharohar” lyngba ka workshop bad ai jinghikai rwai Meeta Bhajans ia ki khynnah pule ka PM Shri School JNV Mukhla, West Jaiñtia Hills District, kata ha ka 2 bad 3 tarik mynta u bnai.
Ka “Kala Dharohar” dei ka sienjam ba la shim kum shibynta ban kyrshan ia ka National Education Policy ha kaba don kiba pyni daki jingrwai, jingshad, don kiba pynlong daki kynja ai jinghikai bapher bapher daki briew ba pawnam ha ki jait kam bapher.
Ha PM Shri School JNV Mukhla la wan ban ai jinghikai rwai Meeta Bhajans da u Jiten Basumatary, Vocal Artist ryngkat u DibyaJyoti Sangmai uba la shim bynta ban tied Tabla bad ka Jonali Ojha Basumatary kala shim bynta haka jingtem Tanpura.
U Principal ka JNV Mukhla u N. Kumar haba ai jingkren ha ka sngi sdang hynnin ka 2 tarik u ong ia kane ka program “Kala Dharohar” ba ar sngi la pynlong ruh kum shi bynta ka jingkynmaw burom iaka lyngkhuh sngi kha ba 525 ka Sant Meera Bai.
Halor ka jingshah jied tang ka skul JNV ban ioh ia kane ka program hapoh ka Jylla Meghalaya, ula ai khublei ia baroh ki khynnah skul da kaba ong kane baroh ka jia dei lyngba ka sap, ka jingshemphang ki khynnah pule kane hi ka skul daka jingbteng jongki ban shim bynta haki jait jingiakop bapher bapher ym tang hapoh ka PM Shri hynrei wat haka District bad State level.
Ka Dr.Pratibha Sarma Project Director Satriya Kendra, Guwahati Sangeet Natak Academy, New Delhi haba kren ha kane ka sngi ka ong ba ha u bnai ban wan yn sa kynmaw burom iaka lyngkhuh sngi kha ba 525 ka Meera Bai, kumta ka sorkar India kala pynlong ia kum kane ka project ha baroh kawei ka Ri da kaba pynlong ki kynja workshop, jingrwai, jingshad bad kiwei.
Bad ha baroh kawei ka Ri la pynkreh ban leh haki 100 tylli ki skul, ki college bad universities, da ka ban hikai iaki khynnah halor ka Meera Bai, kaba lah ban dei haka dur jongka jingrwai jingshad ne siminer.
Ka iathuh ruh ba ka Meera Bai dei ka nongthoh kaba la thoh haduh 14 spah tylli ki peotri bad bun tylli ki Kot, kumta kane dei ka lad ka kabu iangi ban tip shaphang jong ka.
U K.Lato Vice President Rotary Club Jowai uba la donlang kum u kongsan u buh jingkyntu iaki khynnah skul ban shim kabu iaki jinghikai ba ioh ha kine ki ar sngi na kine ki Artist kiba la wan ban ai jinghikai iaki, khnang ba ka jingwan jong ki kan long kaba sah jingkynmaw.
