U Myntri Khynnah jong ka sorkar Pdeng ba dei khmih ia ka Tnat Jal Shakti Dr. Raj Bhushan Choudhary hynnin ka sngi ula peit bniah ia ki skhim bapher bapher jong ka sorkar pdeng ba la pyntreikam ha jylla Meghalaya ha ka jingwan jong u sha nongbah Shillong ha Secretariat.
U Bah C Ymbon, Myntri ba dei khmih ia ka Tnat Water Resource ka jylla u la iadonlang ha kane ka jingialang ryngkat kiwei ki ophisar jong ka sorkar.
Ki ophisar ba dei khmih ia ka tnat ki la pyni ia ki jingjop bad ki jingeh jong ki skhim pynroi bapher bapher ka sorkar pdeng kum ka Jal Jeevan Mission, Pradhan Mantri Krishi Sinchayee Yojana, Samagra Shiksha Abhiyan, Swachh Bharat Mission bad ki skhim ka tnat ka koit ka khiah.
Ha ka jingai jingkren u Myntri ula pynpaw ka jingsngewhun ka jingiaid shaphrang ka jingpyntreikam ia ki skhim ha Meghalaya bad ula iaroh ia ki tnat sorkar jylla na ka bynta ka jingtreikam jong ki.
U Myntri u la iaroh ia ka jylla na ka bynta ka jingpyntreikam jong ka ia ka Jal Jeevan Mission, da kaba ong, “Ka jylla Meghalaya ka la leh ia ka kam kaba khraw ha ka jingpyntreikam ia ka Jal Jeevan Mission.” U la ai jingmut ban pynduna ka jingkyrduh um ha ka por duna um, kynthup ka jingshna ia ki jaka pynlang um. U la tyrwa, “Ha ka jaka ban shaniah tang ha ki wahduid, phi lah ban shna ia ki jaka pynlang um slap, pynkhuid ia ka, bad pyndonkam ia ka ha rukom ba seisoh.” U la batai ba ka jingpynlangia ka umslap na ki jaka ba jur u slap kan long ka jingmyntoi ia ki jaka rilum, kaba long tuhka tyllong um ha ki por duna um.
U Myntri u la kren shaphang ka thong ba kongsan jong ka sorkar ban pynbiang ka umdih kaba shngain sha man ka longiing – JalJeevan Mission. “Ka long ka thong kaba khraw jong ka sorkar India ban pynbiang ka umdih kaba shngain sha man ka longiing,” u la ong. U la ban jur ba ka jingpynpoi ia ka um dih kaba khuid ym tangba ka long ka jingmyntoi ia ka koit ka khiah hynrei ka iarap ruh ha kiwei kiwei ki kam. U la kubur ba ki jingeh ha ka koit ka khiah kiba mih na ki jingpang ba iabit bad u la ong ba ka Swachh Bharat Mission ka la iarap ha ka jingkyntiew ia ka jinglehkhuid katba dang iaid ki snem. U Myntri u la ban jur ia ka jingdonkam ban bteng ia ka jingai jinghikai ha kaba iadei bad ka jingpynjaboh ia ka um bad ki mar bam.
U Dr. Raj Bhushan u la kren shaphang ki jingsngewkhia halor ka jingpynjaboh ia ki wahduid bad u la iaroh ia ki sienjam ba la shim da ka sorkar jylla ha kane ka bynta. Halor ka jingkhlad ki kmie ba dang pun bad ka jingkhlad ki khunlung, u la ban jur halor ka jingkongsan ka pule puthi bad ka jingkyntiew ia ka jingnang jingstad jong ki longkmie. “Ka jingnang jingstad kadeika bynta ba kongsan na ka bynta ka jingpynduna ia kajingkhlad ki kmie ba dang pun bad ki khunlung,” u la ong. U la ong ba ha ki jaka ba la kham kiew ka jingnang jingstad jong ki longkmie, kine ki jaitjingkhlad ki kham duna, kumta ka jingnang jingstad ka long kaba donkam ban pynduna ia kine ki jait jingkhlad. Ka jingkyntiew ia ka um kaba khuid bad ka jingleh khuid ruh kalong ka bynta ba kongsan ban pynduna ka jingkhlad ki khunlung, bad ia kane lah ban kyntiew lyngba ka jingkyntiew ia ka jingnang jingstad jong ki longkmie.” U la iaroh ia ki sienjam ba la shim da ka sorkar jylla ha kaba ia dei bad kine ki bynta.
U Myntri u la kubur ba wat hapdeng ki jingeh ha ka leit ka wan bad ka jinglong lum ki jaka, ka jylla ka la trei bha ha ki bynta bapher bapher. U Myntri u la iaroh ia ka jingtrei borbah jong ka jylla Meghalaya, bad u la ong ba ka sorkar pdeng kan bteng ban ai jingkyrshan ban nang kiew shaphrang.
U Myntri uba la wan sha ka jylla na ka bynta saw sngi un leit ruh sha South West Khasi Hills lashai ka sngi bad peit bniah ia ka jingpyntreikam ia ki skhim jong ka sorkar pdeng ha katei ha district. Un leit jngoh ruh ia ki jaka ba dang pyntrei ia ki projek ha katei ka district.
