U myntri ka tnad surok ka sorkar pdeng u Shri Ajay Tamta mynta ka sngi ka 23 tarik Nailar, 2024 u la wan hiar sha Ri Bhoi District ban pyniaid ia ka jingialang bishar bniah na ka bynta ka NITI Aayog’s Aspirational District Programme. Kane ka jingïalang ka la long ha Conference Hall jong ka ophis jong u Deputy Commissioner ha Nongpoh, ha kaba la don lang da ki Additional Deputy Commissioner, ki Extra Assistant Commissioner, bad ki heh ophisar jong ka District na ki tnad bapher bapher.
Shuwa ban pynlong ïa ka jingïalang, u Myntri ka sorkar pdeng u la leit jngoh ïa ki katto katne ki jaka ba kongsan, ba kynthup ïa ka Umsaw Nongkharai Health and Wellness Centre kaba don ha ka shnong Umsawnongkharai, ka iew Lay-bye Markat kaba don ha ka shnong Dulongnar, bad ka jaka rep sohtrun ha ka shnong Nongkhrah. Ha kine ki jingleit jngoh, u Myntri ka Sorkar pdeng u la jurip ia ki jaka bad u la ioh ban ia kren bad ki nongrep ban ia kren halor ki jingeh kiba ki iakynduh bad ki jingmyntoi kiba ki la ioh na ki skhim bapher bapher.
Ha kane ka jingialang bishar bniah kaba la long ha conference hall jong ka ophis u Deputy Commissioner ka Ri bhoi, la ioh ia ki jing batai bniah da u Project Director ka DRDA u bah Raja Brahma, MCS, ha ryngkat kiwei pat ki ophisar na ki tnad bapher bapher ha kaba ki la ioh ban ai jingtip shaphang ka jingïaid shaphrang jong ka kam ha kylleng ki jaka kiba kongsan, kynthup ïa ka koit ka khiah bad ka jingbam kaba tei met, ka pule puthi, ka rep ka riang, halor ka jingtreikam ka tnad PHE, ka tnad PWD, ki tyllong umbam umdih bad kiwei kiwei. Kine ki jingbatai bniah kidei halor ki kam ba la leh hapoh ka Aspirational District Programme bad ki jingpyntrei kam iaki kiwei kiwei pat ki skhim ba la kyrshan da ka sorkar pdeng.
Ha ka jingkren jong u myntri ka sorkar pdeng u la ai khublei ia baroh ki ophisar kiba la ai iaki jingbatai bnaih halor kane ka jingwan ban jurip jong u ia ka Ri Bhoi bad u la ai mynsiem ruh ia ki ophisar ba kin nang bteng ban treikam bha bad ki dei ban don barabor iaka mynsiem jong ka jingaiti lut, da kaba kyntu ruh ia ki ba kin ia nangtrei shitom ban ialeh ban long kiba tbit haba ia nujor bad kiwei pat ki district ha ka jylla, ha ryngkat ka jingthmu ban kyntiew ia ki kam jong ka District.
