Kawei ka mem naduh Ri Australia ka la wan phah khem met ha Dwar Jingkhiah ne ka traditional Spa kaba don ha Laitmawsiang. Ha kane ka jaka sumar, la khem ia ki nongpang da kaba pyndonkam da ka dawai kynbat bad da ka rukom khem katkum ka jingstad u Khasi. Ka President ka Grassroot, ka kong Mayfareen Ryntathiang, ka la iathuh mar ia plie ia kane ka jaka khem met, ka mem na ri Australia ka dei kaba nyngkong eh ban ioh ia ka jingsumar ha kane ka jaka. Ka kong Mayfareen ka la pynpaw ia ka jingkyrmen ba kane ka jaka khem kaba la pyndonkam da ka jingstad tynrai Khasi ryngkat ki kynbat kan sa khring ia kiba bun ki briew na satlak ka pyrthei. “Ki la don kiba kam lypa ruh ban shah khem. Mynta ruh, la don i phareng na ri Australia”, la ong ka kong Mayfareen.
Ka la iathuh ruh ba shwa ban plie, la don kiba kylli, bad phah khem ruh shwa ban plie ia kane ka jaka khem. Ka daw kaba la pyllong ia ka Grassroot ban buh ia ka SPA ha katei ka jaka kaba kham kyndong na sor, ka dei namar ban plie lad ia ka ai kam ai jam ia ki samla ka shnong. U CEM ka KHADC u bah Pyniaid Sing Syiem ha katei ka sngi plie, ula ong ba ki nongsumar dawai tynrai Khasi, kiba la ioh ia ka jingithuh ne syrnod na ka KHADC ki lah ban wah da ka sign board kaba heh ha phyllaw iing jong ki, bad kim donkam shuh ban sumar haba rieh.
U bah Pyniaid u la ong ba katkum ka KHADC (Promotion and Protection of Khasi Traditional Medicines) Act 2011 bad la wanrah ia ka rule ha 2013.“Kane ka ain ka la ai bor ia ki nongsumar dawai tynrai ba ki lah ban pynbna paidbah da kaba wah signboard, ym shuh ban shu sumar haba rieh khlem nud ban pynbna paidbah,” ong u CEM. U CEM ula ong ba ki don kumba 1000 tam ki nongsumar dawai tynrai ha ri Khasi bad haduh mynta la ioh ban ai syrnod tang 200 ngut tam eiei.
