Ka Harijan Panchayat Committee (HPC) ha ryngkat ki nongialam ka Shiromani Gurdwara Parbandhak Committee (SGPC) na Jylla Punjab hynne ka sngi ki la shong jingialang bad u Chief Secretary (CS) ka Jylla ban iathir halor ka jingthmu ban kynriah ia ki briew na Them Iew Mawlong. Haba kren sha ki lad pathai khubor u nongialam ka SGPC na Punjab u Jagmohan Singh ula ong ka jingiakynduh ia u Chief Secretary ka dei ban iakren halor ki jingsngewkhia ki jaidbynriew Sikhs kiba sah ha Them Iew Mawlong. “Ka jingialang ka long shibynta ka jingiakren ba dang iaid shakhmat ban kynriah ia kiba sah ha Them Iew Mawlong, ngi la pynsngew ia ki jingai jingmut jong ngi, hynrei ka dang kloi palat ban batai halor ka jingialang” la ong u Jagmohan.
U Jagmohan ula kubur ka jingialang bad u CS ka long kaba sei soh bad ka SGPC, ka HPC ki kyrmen ba shen yn lah ban weng noh ia ki jingeh ki nongshong shnong na Them Iew Mawlong. Haba kylli u Jagmohan ula ong, “Ka pynsngewkhia ia ngi namar ki jaidbynriew Sikh ki la wan 200 snem mynshuwa na Punjab, ka shnong jong ki ka dei ka Jylla Punjab, kiba haiing hasem bad ki jaka jong ki ki don ha Punjab, kumta lada don kino kino ki Sikh ha kano kano ka jaka ha ka pyrthei kiba sngewsih ne shem jingeh, ngi ruh ngi sngewsih namar kata ngi wan shane ban pynpaw ia ka jingiatylli bad ki” u la ong.
U Jagmohan ula pynksan ba ka jingwan jong ka SGPC kam dei ban thaw jingkulmar ne wanrah kano kano ka jingsnewthuh bakla hynrei ka dei tang ban ai mynsiem ia ka HPC ban iakren bad ka Sorkar Jylla halor ka jingthmu ban kynriah ia ki na Them Iew Mawlong sha kawei pat ka jaka.
