Ka Meghalaya Board of School Education (MBOSE) mynta ka sngi ka la pynbna ia ka resol jong ka Higher Secondary School Leaving Certificate (HSSLC) ha ka Science bad Commerce Stream. Ia ka kyrdan ba nyngkong First Top Ten ha ka Science la rah da u Sohan Battarcharjee uba la ioh 483 mark bad u ioh distinction ha baroh 6 tylli ki sobjek na ka skul Laban Bengalee Boys Higher Secondary School bad ia ka kyrdan banyngkong ha ka Commerce la rah da ka Ferry Filarisha Wann kaba la ioh 472 mark bad ka la ioh distinction ha ki tylli ki sobjek na ka skul St. Mary’s Higher Secondary School. Ha ka Science Stream, ia ka kyrdan ba ar la rah da u Gordon Kupar Nongbri uba la ioh 476 mark bad distinction ha ki 6 tylli ki sobjek na ka skul St Edmunds Higher Secondary School bad ia ka kyrdan balai la rah da Ar Meker Marpna uba la ioh 471 mark bad distinction ha ki 6 tylli ki sobjek na ka skul St.
Anthonys Higher Secondary School. Katba ha ka Commerce Stream, ia ka kyrdan baar la ioh da u Raj Paul uba la ioh 463 mark bad distinction ha ki 6 tylli ki sobjek na ka skul St. Anthony Higher Secondary School bad ia ka kyrdan balai la ioh da u Pongkoch Dutta uba la ioh 458 Mark bad distinction ha ki 6 tylli ki sobjek na ka skul Laban Bengalee Higher Secondary School. Katkum ka resol ka MBoSE ka pynpaw ba ki khynnah ki la leh bha ha ka eksam HSSLC Science 2024 ha kaba ki la pass 87.13 percent ha ka regular, na ki 3426 ngut ba iakhun eksam ki la pass 2985 ngut, katba ha ka non regular ki la pass 85.24 percent, kata na ki 3766 ngut ba iakhun eksam ki la pass 3210 ngut.
Kumjuh ha ka Commerce Stream ki khynnah ki la leh bha ia ka eksam ha kaba ki la pass da 83.26 percent ha ka regular, kata na ki 2162 ngut ba iakhun eksam ki la pass 1800 ngut bad ka non regular ki la pass 80.26 percent, kata na ki 2411 kiba iakhun ki la pass 1935 ngut. Katba ha ka vocational stream ki don 11 ngut kiba iakhun eksam bad baroh ki la pass lut.
