Ka Meghalaya Board of School Education (MBoSE) hynne ka ka sngi ka la pyllait ia ka Result jong ka Secondary School Leaving Certificate (SSLC) ne Matrik bad ka Higher Secondary School Leaving Certificate (HSSLC) Arts, ha kaba u Anuj Chetry jong ka Sherwood School, Tura ula ioh bat ia ka kyrdan banyngkong eh ha ka SSLC, katba u samla Menangmankhraw Kharkongor bad u Gaurav Bharali ki la ioh ia ka kyrdan ba nyngkong ha ka klass XII Arts na St. Anthony HSS Shillong. Ha ka eksam Matrik, u Anuj Chetry jong ka Sherwood School, Tura ula ioh bat ia ka kyrdan banyngkong eh da kaba ioh 575 mark bad ula ioh Distinction haduh 6 tylli sobjek, katba ka samla Aleytheia Syiemlieh ka ioh 574 mark ha ka kyrdan baar na St. Margaret HSS, Shillong bad ioh distinction 6 tylli ki sobjek bad u samla Congenial Kharsahnoh u ioh 571 mark ha ka kyrdan balai na ka Christian Academy, Shillong bad ioh distinction ha ki 6 tylli ki sobjek.
Haba phai pat sha ka eksam HSSLC ne Klas XII Arts, u samla Menangmankhraw Kharkongor na St Anthony HSS Shillong bad u Gaurav Bharali jong ka St. Edmund’s HSS Shillong kiba la ioh mar 468 marks ki la ioh bat ia ka kyrdan banyngkong mynta u snem bad kine baroh ar ngut ki la ioh ruh ia ka Distinction ha ki 6 tylli ki sobjek. Ka Tanisha Das jong ka Don Bosco College, Tura ka la wan baar bad ka la ioh 451 marks bad Distinction ha ki 6 tylli ki sobjek bad u Salseng Marak na ka Don Bosco College, Tura ula wan balai uba la ioh 450 marks bad distinction ha ki 6 tylli ki sobjek.
Ha ka SSLC ki la don 54134 ngut ki samla kiba la iakhun ia kane ka eksamin hynrei kiba pass ki don 30207 ngut, kumta ka jingpass ki khynnah ka long 55.80%.Ka West Jaintia Hills ka dei ka District kaba don bun eh ki khynnah kiba pass kaba la kot 78.34% katba ka North Garo Hills ka dei ka district kaba ki khynnah ki la pass duna bha kaba kot tang 23.88%.Katba ha ka HSSLC Arts, ki la don 27374 ngut kiba la iakhun ia ka eksamin HSSLC bad kiba la pass ki don 21833 bad ka jingpass ki samla pule mynta ka kynti ka long 79.76%. Ka Eastern West Khasi Hills ka dei kaba don bun eh ki samla kiba la pass ia ka eksamin kaba long 92.32%, katba ka West Garo Hills ka dei ka district kaba duna tam ki samla pule ki ban pass ia kane ka eksamin kaba long 65.60%.
