Ki nongrwai ba pawnam ka pyrthei kynthup u Akon, BoneyM mynta ka sngi ki la wan poi ha Guwahati na bynta ban wan sha nongbah Shillong ban pynlynguh ia ki paidbah ha ka 15 tarik ha Madan kurkalang, Bhoirymbong. Ka jingpynkhreh ia ki rynsan bad kiwei ki jingdonkam na ka bynta ka tamasa cherry blossom ka la iaid shaid shaid ha madan Kurkalang, Bhoirymbong. La iohi ba ka jingshna ka la iaid naduh ka rynsan ban rwai, haduh ki jaka shong, ki dukan, ki jaka shad DJ bad kiwei kiwei. Ka tamasa cherry blossom kan long ar sngi, kata ha ka 15 bad ha ka 16 tarik mynta u bnai. Nalor u nongrwai ba pawnam ka pyrthei u Akon, yn wan rwai ruh ka kynhun BoneyM, ka Clean Bandit, bad kiwei ban pynlynguh thui ia ki paidbah ha kitei ki ar sngi.
Kane ka dei ka sien kaba ar ha ka tamasa cherry blossom ba ki nongrwai ba pawnam na ka pyrthei kin wan. Mynshem snem, ki nongrwai ba pawnam kum u Neyo, bad u Ronan Keating, Jonas Blue, Sanam bad kiwei ki la pynhun ia ki paidbah ha katei ka lympung. Mynta u snem, ki nongrwai kiba paw nalor u Akon, BoneyM, Clean Bandit, kin long u Lucas na Korea, R3HAB (rehab) bad kiwei kin pynthnem ia katei ka madan. Ia kane ka tamasa yn plie da u Jyotiraditya M. Scindia, Myntri ba dei khmih ia ka Tnad Development of the North Eastern Region (DoNER) ha ka janmiet jong ka 15 tarik Naiwieng kum shi bynta ka jingwan jngoh kaba lai sngi jong u ia ki jylla ka thain shatei lammihngi ka ban sdang naduh lashai ka sngi.
Ha ka jingleit jngoh jong u ia kiwei ki jylla ka thain shatei lammihngi, u Scindia un pynlong ia ki jingialang peit bniah bad ki Myntri Rangbah jong ka jylla Arunachal Pradesh, Nagaland, Mizoram, bad Tripura.U Scindia un iashim bynta ruh ha ka prokram Janjatiya Gaurav Diwas ha Agartala ha ka 15 tarik Naiwieng.
