Ki paidbah ka jylla ba sah ha ki thain khappud bad ka ri Bangladesh ki don hapdeng ka jingsyier, namar ka jingjia ha Ri Bangladesh bad khamtam lada jia ba ki nong Bangladesh ki thnu ban wan rungtuh ne rung be-aiñ sha ka jylla Meghalaya. Haba iakren bad ki paidbah ha khappud ki la ong, naduh ba khyllem ka sorkar ha Ri Bangladesh ki don jingsyier, namar ki rit paid ha Bangladesh ki don ha ka jingma bad kin don kiba pyrshang ban wan rungtuh sha ri India lyngba ka jylla Meghalaya. Kawei ka longkmie ka la ong, lada ki nong Bangladesh kin wan rung ha India kin ym wan tang khyndiat ngut hynrei kin wan da ki hajar ngut bad kan buh jingma ba khraw ia ki paidbah ba sah ha ki Thaiñ khappud. “Ki nong Bangla lada ki wan rung kin ym wan tang iwei ne ar ngut hynrei kin wan da ki hajar ngut, kumta ki paidbah ba sah ha khappud ki don ka jingtieng bad jingsyier” la ong u Rangbah Shnong ka Dawki u Bah M Ryngksai. Ula bynrap ki paidbah ki don ka jingshaniah ia ki shipai BSF ban iada ia u pud u sam bad ia ki nongshong shnong bad mynta ki la sngew shngain ban iohi ki shipai ki la syrtap ha katei ka thain bad na ka liang ka bor shnong ruh ki ai ka jingkyrshan bad jingiatreilang ia ki shipai BSF. Kawei pat ka longkmie ka la ong, ba ki paidbah ki dei ban iatreilang bad ki BSF bad haba ki ioh kino kino ki jingtip ki dei ban pyntip mardor sha ki shipai BSF khnang ba kin ioh ban shim ki lad ki lynti.
Ki la iathuh ha ka sngi ba ka Prime Minister ka Bangladesh ka Sheikh Hasina ka la hiar shuki noh bad phet krad syndon na ka ri Bangladesh, ki paidbah ka Bangladesh ki la wan tur kynsan ban kawang maw hajan ka Wah Umngot bad kane ka la pynsyier ia ki paidbah ba ioh lehse kine ki nong Bangla ki don jongthmu ruh ban wan rung tuh shapoh ri India. Ki la ong, kane ka jingwan tuh maw ki nong Bangla ka la sdang biang 5 snem hadien ba ka sorkar Bangladesh ka la khang pyrshah ban kharmaw na khappud bad ka ri India. Ki la iathuh ka jingtuh maw ki nong Bangla ki ioh lad namar ka jingbym don ki bor sorkar ne ki shipai BGB ki ban pahara ha ki thain khappud. U Rangbah Shnong ka Dawki ula ong, ka shnong ka la pynkhreh ban iada ia ka shnong ka thaw na ka jingwan rung tuh ki Nong Bangla ryngkat ka jingiatreilang bad ki pulit bad ki shipai BSF. Katba kawei pat ka longkmie kala ong, ba kin ym.ailad ba ki nong Bangladesh ne ki Rohingya ba kin wan rung tuh shapoh u pud u sam ka Meghalaya hynrei lada dei pat ba ki paid Khasi kiba sah ha Bangladesh ki wanphai dei ban ailad ia ki ban rung shapoh ka jylla.
Ki paidbah ki la iathuh ha ka sngi nyngkong ki nong Bangladesh ki la wan ban tur haduh hajan ka ICP Dawki hynrei kim shym la nud pat ban rung jubor shapoh ri India hynrei ha ka sngi Baar ki BSF ki la nang pynjur ia ka jingpahara ha ki thaiñ khappud bad khamtam ha ka ICP Dawki bad hynne ka sngi katei ka jaka ka la kynjah jar jar. Ki paidbah ki la pynpaw ba ka jongpynjari ka sorkar jylla ia ka Korphiw miet ka la wanrah ka jingduhnong kaba khraw ia ki paidbah namar ba ki la hap ban sangeh noh ia ki kam ki jam ki jong ki dang kloi hynrei ki la kubur pat ba ka jingpynjari ia ka korphiw ka la iarap shibun ban peitngor ia ka iaid ka ieng ki briew kiba na Bangladesh kiba thmu ban wan rung be-aiñ shapoh ka jylla Meghalaya. Namar ka jinglong jingman ha Bangladesh, ka sorkar jylla ha ka lah sngi u Blei, ka la pynjari ia ka korphiw miet naduh ka por 6 baje janmiet haduh ka por 6 baje mynstep bad kane kan iai bteng katba ym pat pynbna da kumwei pat.
