Haduh 175 ngut ki samla pule na ka jylla Meghalaya, Assam kiba pule hapoh ri Bangladesh, hynne ka sngi ki la wan phai noh sha ka ri India lyngba ka thaiñ Dawki lyngba ka Land Port Authority Dawki.
“Haduh hynne ka sngi, ki la don 175 ngut ki samla pule kiba la wan na ka ri Bangladesh shapoh ka ri India lyngba ka Dawki hadien ba ka la mih ka jinghuri hura ha Bangladesh” ong u Assistant Nodal Officer u Gamaliyel Thomas. “Na kitei ki 175 ngut ki samla pule kiba la wan phai noh shapoh ka ri India, ki kynthup ia ki samla pule na ka jylla Meghalaya, Assam bad bun ngut ruh ki samla pule na ka ri Nepal. Kumba 55% na kitei kiba wanphai kidei ki samla pule na ka jylla Meghalaya” ong u Thomas. Ula iathuh ba kila pynbiang ia ki bus na ka bynta ka leit ka wan ka jong kine ki samla kiba wanphai.
U Nodal Officer ula iathuh ba ula iakren bad kine ki samla pule ha kaba kila pyntip ba kim shym la mad ia kano kano ka jingeh ne kano kano ka jingjia ha ka jingmih noh ka jongki napoh ri Bangladesh ban wan shapoh ri India hynrei kial dap pat da ka jingtieng bad jingsyier ia kaei kaba la jia hapohka ri Bangladesh.
Ula ong, ba lada ka jinglong jingman jong ka jinghuri hura ka dang iai bteng hapoh ka ri Bangladesh, kumta kila khmih lynti ba kin dang bun shuh shuh ki samla pule kiban wanphai sha ri India hynrei kila long pat kiba la pynkhreh ban pdiang bad ban ai jingiarap ia ki samla pule kiba na ka ri India.
Ka jingwanphai bad ka jingphet noh kine ki samla pule na ka ri Bangladesh kadei hadien ba kala mih ka jinghuri hura hapoh katei ka ri baroh kawei, halor ka bhah thungkam thungjam ha ki kam sorkar.
Na ka liang ka sorkar pdeng kala pynmih iaka jingbthah ia ki nong India bad khamta mia ki samla pule kiba don hapoh ka ri Bangladesh ba kidei ban kiar ha ka leit ka wan shabar jong ka jaka sah ka jongki bad lada don kano kano ka jingjia ne ki donkam ia ka jingiarap kidei ban pyntip sha u High Commissioner bad sha u Assistant High Commissioner ka ri India kiba don ha Bangladesh da kaba phone ia ki.
High Commission of India, Dhaka, +880-1937400591, Assistant High Commission of India +880-1814654797/ +880-1814654799, Assistant High Commission of India, Rajshahi + 880-1788148696, Assistant High Commission of India, Sylhet + 880-1313076411 bad Assistant High Commission of India, Khulna + 880-1812817799.
Haduh ka por 7 baje janmiet, ki la wan poi haduh 310 ngut ki nongshong shnong na ka ri India, Nepal bad Bhutan bad 95 % na kine kiba wanphai kidei ki samla kiba pule hapoh ri Bangladesh. Na kitei ki 310 ngut kiba la wan phai sha ri India, ki kynthup ia ki 202 ngut ki dei ki Nong India kiba kynthup lang ia ki 67 ngut na ka jylla Meghalaya, 101 ngut ki dei ki samla pule kiba na Nepal bad 7 ngut ki dei ki samla pule na Bhutan. U Myntri Rangbah ka Jylla u Conrad K Sangma ula pyntip ba ka Sorkar Meghalaya kala shimkhia ban iakren bad ka Ophis jong u High Commission ka India sha Bangladesh nalor ka Land Port Authority bad ka Exporter Association bad ka Sorkar kala shim ia baroh ki sienjam kiba kongsan ban pynthikna ia ka jingwan phai suk ki samla ka Meghalaya na Bangladesh.
