Ka Myntri ka tnad Information and Public Relation ka kong Ampareen Lyngdoh ka la iathuh ba ka sorkar jylla ka tyrwa ban wanrah ia ka Meghalaya Journalist Welfare Scheme 2024 kaba thymmai na bynta ban iarap ia ki nongthoh khubor kiba mad jingeh. Ka Myntri haba jubab ia ka jingkylli ba la wanrah da u MLA ka BJP u bah Sanbor Shullai hynne ka sngi ha Iing Dorbar, ka la iathuh ba ki nongthoh khubor hapoh ka Meghalaya Journalist Welfare Scheme, 2009 ki ioh ia ki jingiarap. U MLA ka South Shillong u bah Sanbor uba la bynrap jingkylli ba ka jingioh ki nongthoh khubor hapoh ka Welfare Scheme, 2009 ka long kaba duna bad u la kyntu ban pynkiew sha ka 100 percent ia kane ka skhim.
Halor kane ka Kong Ampareen ka la kubur ba ka skhim jong u 2009 ka dei kaba la rim bad ka jingioh ka dang kham duna namarkata ka sorkar mynta ka la pynkhreh ban tyrwa ia ka Meghalaya Journalist Scheme 2024. Ha kane ka Meghalaya Journalist Scheme 2024, ka Myntri ka pyntip ba ka Sorkar kala tyrwa ban pynkiew haduh 500 percent lada jia ka jingiap ki nongthoh khubor kata ka long na ka T. lak yn pynkiew sha ka T.5 lak bad na ka bynta ka bai sumar ha ka pang shitom la pynkiew na ka T. 50,000 sha ka T. 3 lak. Ha kajuh ka por ka la pynshlur ia ki nongthoh khubor ba kin pynrung kyrteng ha ka Meghalaya Health Insurance Scheme (MHIS) namar ka long kawei ka lad jingiarap kaba biang bha.
Halor ka jingkylli bynrap da MLA ka Nongpoh u bah Marylborn Syiem, ka Kong Ampareen ka la ong ba ka dei ka jingshisha ba ym baroh ki nongthoh khubor ioh ia ka tulop ba heh hynrei don ruh ki nongthoh khubor kiba mad ia ki jingeh namar ka jingbym ioh ia ka jingsiew ba thikna. “Ngi sngewkhia ia kane hynrei ki nongthoh khubor ki dei kiba la thungkam da ki riew shimet bad ngi dang shim ia ki sienjam ban pynthikna ba ki nongthoh khubor kiba kamai duna ia ka T.15000 kin shah pynhap hapoh ka Provident Fund Scheme,” ong ka kong Ampareen.
