Ka Khasi Student Union (KSU) Employment Monitoring Cell kala dawa na u Myntri ka tnat Bording u A.T Mondal ban tuklar haba iadei bad ka jingshah pynsangeh thungkam hapoh Meghalaya Electricity Corporation Board (MeECL.
Haba kren sha ki lad pathai khubor hadien ka jingkynduh ia u A.T Mondal, u samla Ruben Naijar ula iathuh baka tnat MeECL naduh 2019 kala pynbna lait kam Assistant Engineer bad iaka eksamin thepkam ruh la pyndep ha u 2019.
U samla Ruben ula iathuh ba kila don haduh 24 ngut ki samla kiba la pyndep iaka eksamin hynrei kynsan ka MeECL kala pynkut noh ban khot iaka Interview naka bynta kito kiba la pyndep iaka eksamin.
Ula iathuh ba naka liang ka KSU kala dep ban kynduh ia u Chairman cum Managing Director (CMD) ka MeECL haka 24 tarik Lber 2023 halor kane hynrei ka ioh jingtip ba ka jingpynkut noh ban khot Interview kadei namar baka tnat Bording kam don pisa.
“Ka seng kala kren shai sha u Director ka MeECL ba kam lah ban ai daw ba ym don pisa namar iaka kam bala pynbna kadei kaba la mang hynrei ka long kaba lyngoh ba wat hadien 4 snem tam, ka MeECL ka khlem pat khot iaka Interview” la ong u samla Ruben.
U samla Ruben ula pyntip ba ka KSU kala kyntu ia u Myntri ka Tnat Bording ban tuklar halor kane, namar ka seng bad ki paidbah ka Jylla baroh kawei kim lah ban pdiang iaka jingkam u Director ba ka MeECL kam don pisa ban siew tulop lada thung kam iaki 24 ngut.
Ula iathuh ba wat naka liang u Myntri ka tnat Bording ula pynpaw ka jingsngew bynniaw halor kane bad ula kular ban shimkhia da kaba lum ka jingialang bad ka MeECL ban pan jingpynshai, halor ka jingsangeh thungkam iaki 24 ngut kiba la pyndep iaka eksamin.
“Ka seng kala pypaw hakhmat u Myntri ka tnat Bording, ba ka don ka jingpynlut phut khlem ka jingmyntoi iaki paidbah ha ki skhim bapher bapher kum haka jingpyntreikam iaka Saubhagya Scheme kaba kot haudh T.150 klur nalor kiwei kiwei bad naka liang u Myntri ula kubur halor kane daka ba ong “Ka jingtohkit ka dang iaid halor kine ki jingshah kynnoh bamsap” ula ong.
+ There are no comments
Add yours