Wat hadien ba ki bor district bad ka National Green Tribunal (NGT) ki la khang ban tih maw bad khyndew ha ki thain Rani Jirang, Ri Bhoi District, namar ka pynjot bad pynjulor ia ka mariang na ka jingtih maw pathar, hynrei ha kine ki ar taiew ki dkhar na Assam ki la sdang biang ban tihmaw bad khyndew tuh ha ki katto katne ki jaka kum ha Mairapur, Iewmawroh ki jaka ba kham kyndong.
La iathuh hadien ba la khang ka NGT ia ka jingtihmaw be-ain, hynrei ki dkhar na Assam ha kine ki khydiat sngi ki la sdang biang ban tihmaw bad khyndew be-ain ha ki thain Rani Jirang khlem ka jingtip ki bor Hima, bad bun ki wan trei ha ka por miet bym don shuh ki nongleit nongwan ban khlong maw bad tih khyndew bad kiba trei mynsngi ha ki jaka ba kham kyndong, hynrei kim nud shuh ban thang bom kumba long mynshwa bad ki pynpra ia u maw da ki kor ki bor bad ka bor met.
Kum ban pynpaw ka jingtih maw bad khyndew ha ka thain Rani Jirang ka la sangeh da ki snem bad bun ki kor tyllait ki la shu sah khongreng bad don pat kiba la shah loit ha ki bor District Ri Bhoi halor ka nongrim ba kim lah ban pynbiang ia ki kot ki sla kum ka Mining Plan bad kiwei bad ka jingtihmaw be-ain.
Kumba long mynta katei ka thain namar ka dei ha khappud bad ka jylla Assam ki bor District bad Hima ki shem jingeh ban tehlakam ia ka jingwan tihmaw bad khyndew ki dkhar na Assam ha ka por miet bym don briew. Lah ban ong ka Hima Jirang naduh shnong Gunpati shaduh Iew Mawrohrim ka la lwet phum na ka jingtihmaw bad khyndew be-ain ba khlem kyndon na ka ophis u Syiem bad bad ka jingaimon ki trai jaka ka pynlong ia ki dkhar na Assam ban shim kabu ban ioh kamai spah. Ki Khasi kiba shah kyrteng ki hun ban ioh kamai T.2000 ne T.3000 ha ka sngi Iew Rani kum ka bai bam taiew katba ki dkhar ki kamai da ki phew lak ha ki shi taiew. Kumta ka jingtihmaw bad khyndew ha ka thain Rani Jirang ka pynriew spah ia ki dkhar bad pynjot ia ka Hima Jirang.
Kawei pat ka tyllong khubor ka iathuh ba ki trai jaka ki Khasi ha kine ki sngi ki bun kam ban leit hajir man ka taiew ha iing bishar ia ki mukotduma halor ka jingtihmaw be-ain, katba ki dkhar ki la sdang biang ia ka jingtihmaw bad khyndew be-ain.
Ki bor District bad ki pulit ryngkat ka tnat Forest ha Rani Jirang ki dei ban Peitngor ia ka jingtihmaw bad khyndew be-ain ha ki thain Rani Jirang, Ri Bhoi District kaba wanrah ia ka jingjulor ka mariang bad ki jingdon jingem jong ka.
