Wat hadien ba shah niew beain, rai ki samla ban bteng kamai da ki ar shaka

Wat hadien ba ka Sorkar ka la pynbna beain, ki samla ba kamai da ki ar shaka ki la pynbna ban bteng beit ia ka jingkamai ha nongbah Shillong. Ia kane ka rai, ki samla kamai ar shaka ha ka lama ‘Ride to Serve’ ki la shim ha ka jingialang ba la pynlong ha Madan Malki.  Haba kren sha ki lad pathai khubor u samla Kyntiew Nongkynrih u la iathuh naduh ki snem ba la dep, ki la leit kynduh ia u District Transport Officers (DTO) ban pan jingbit lane Permit hynrei haduh mynta ka tnat Transport lane na ka ophis DTO kam pat jubab satia.

U samla Kyntiew ula iathuh ba ki don palat 300 ngut ki samla ba kamai jakpoh da kaba niah arshaka ha Shillong hynrei kane ka jingpybna beain ka Sorkar kan ktah ia ki ha ka liang ka kamai ka jih. “Ka Jylla ka don hapdeng ka jingkyrduh kam, hynrei ka long kaba thamula ba ka Sorkar ka pynbna beain ia ngi kiba pyrshang ban ieng ha la ki jong ki kjat ban kamai da ki arshaka” la ong u samla Kyntiew.

U samla Kyntiew ula ong, ha ka taiew ban wan, kin leit kynduh ia Myntri ka tnat Transport ka Sorkar Jylla bad ia u Chief Secretary ban pan jingbit ne Permit na ka bynta ban ioh kamai biang khlem kano kano ka jingshah pynwit ha ka ain.