Ki pulit ka Ri Bhoi District ki la trei shitom ban ratdyngkhong ia ki jingsniew hapoh ka district, khamtam ka pyrshang pyntriem ki dkhot (sleeper cell) jong ka kynhun kieng atiar ka Hynniewtrep National Liberation Council (HNLC), ki pulit hynnin ka sngi ka 10 tarik u Jylliew ki la ioh ban pynpra ia kane ka Sleeper Cell bad ioh kem ia 3 ngut ki briew ba la kynnoh donkti ha ki kam dawa pisa bad ban sam ia ki shithi dawa pisa sha ki riew shimet hapoh ka District.
Katkum ka kyrwoh ba la phah da u Superintendent of Police ka Ri Bhoi District, u Jagpal Singh Dhanoa, ula pyntip na ka liang ki bor pulit ki la ioh jingtip bad bun ki jingujor halor ka jingsdang khie im biang ka kynhun ba trei na rieh na ka bynta ka HNLC ia kaba la tip kum ka Sleeper Cell kaba treikam ha ki thain Mawhati bad Umroi kumjuh ha ki thain ka nongbah Shillong, kumta ka tnat pulit ka la sdang ban pynlong ia ka jingtohkit bniah halor kane ka jingujor.
U la pyntip ruh, ba ia kane ka kynhun barieh jong ka HNLC la ioh jingtip ba la lamkhmat da uwei u briew ba la tip kyrteng kum u Cyfrank Paul Pariat ba shong basah ha ka shnong Ummat Ri Bhoi District, ha kaba ha ryngkat kiwei ki dkhot ki ju donkti ban phah ne sam ia ki shithi dawa pisa sha ki riew shimet bad kiba sengkam lajong bad ban byrthen ruh ban shim da ki lad ba tyngeh ia kine ki briew lada kim siew ia ka pisa ba la dawa da ka seng.
U Jagpal u la iathuh ruh, ba hadien ka jingioh jingtip kaba tikna, ki bor pulit ka Police Headquarter bad Ri Bhoi DEF ha ka 10 tarik u Jylliew, ki la pynlong ia ka jingkhynra bad ka jingthwet ia kine ki briew ha katei ka thain bad ki la lah ban jop da kaba iohkem ia ki 3 ngut ki briew kiba la kynnoh donkti bad kane ka sleeper cell kiba kynthup ia u Cyfrank Paul Pariat (25) u ba la kam ialade kum u Commander ka HNLC, u Kitbok Mujai (23) kiba dei na ka shnong Ummat bad u wei pat u Barnabas Lyngdoh (49) na ka shnong Khyndewsoo.
La pyntip ruh, ba kine ki 3 ngut ki dei ki briew kiba la leit pyniasoh bad ka HNLC dang shen bad kiba la donkti ban dawa pisa ne ban kyrshan pisa ia ki kam jong ka HNLC kaba hap hapoh ka UAP Act bad ha u snem ba la dep ki la leit ruh sha ka ri Bangladesh ban pyndep ia ka training, halor kane ka jingshah kem jong kine ki 3 ngut ki dkhot ka HNLC ki pulit ki la pynngat ha ki kyndon ain jong ka Umiam PS Case No. 46(06)2024 u/s-120B/506 IPC R/w sec-10/13/17/18 UAP Act.
La iathuh ha ka jingtohkit ia kine 3 ngut ki pulit ki la nanglap ksai ia kiwei kiba donkti lang ha ki kam dawa pisa bad mynta la buh ia kine ki 3 ngut hapoh ka police custody na bynta ka jingtohkit.
Na ka liang u Superintendent of Police, Jagpal Singh Dhanoa u la phah ia ka kyrwoh sha baroh ki nongshong shnong ka them Ri Bhoi District, ba kim dei ban shah pynngop ha ki jingshah pynshoi ha kum kine ki briew kiba don ia ki jingthmu ba sniew hapoh ka imlang ka sahlang bad ruh ia kito kiba ioh pdiang ia ki shithi dawa pisa na ka HNLC ba kim dei ban pdiang ne leit ai ia ka pisa kumba la dawa hynrei ba kin long kiba shlur ban leit pyntip sha ki bor pulit khnang ban ioh leh pat ia kaba donkam na ka liang ki bor ka ain.
