U President ka Voice of the People Party (VPP) Bah Ardent M Basaiawmoit ha ka sngi Thohdieng ula bthah ia u Myntri Rangbah ka Assam Himanta Biswa Sarma ban peit shwa ia la ka jong ka kyrpong ha ka jaka ban mushlia/tuklar ia ki kam ki jam ka Meghalaya.
Lah ban kdew ba dang shen u Myntri Rangbah ka Jylla Assam u Himanta Biswa Sarma ula kynnoh ba ka jingshah rem ki kyrtong ka NDA hapoh Meghalaya ka dei na kawei ka niam hapoh kane ka Jylla.
Haba pynrem ia ki jingkynthoh u Himanta, u Bah Ardent ula ong, “Kane ka dei ka khubor kaba nga kwah phah sha u Himanta Biswa Sarma, u Myntri Rangbah ka Jylla Assam, uba ju kren lamwir lamtham bad um dei ban tuklar ia ka kam kiwei hynrei ban khmih ia la ka jong ka kyrpong. Um don hok satia ban tuklar ia ki kam jong ka Jylla Meghalaya haba ia dei bad ka ilekshon ba dang shu dep”.
U Bah Ardent ula ong, “Ha ka riti synshar paidbah kum ka India, ki paidbah ka Meghalaya ki don ia ka hok ban jied ia uno uno u briew katba u dang dei hi u nong India bad uba lah ban long u kyrtong. Ki paidbah ka Meghalaya kim dei kiba biej, ban ym tip ia ki jingthmu, ki thong, ki mat jong kiwei pat ki seng sain pyrthei kiba iashim bynta ha kane ka ilekshon. kum ki nongshong shnong kane ka Ri Synshar paidbah, ngi don ka hok ban jied ia kano kano ka party kaba ngi kwah” ula bynrap.
U la ong ba ki Niam/Balang ha Meghalaya kim ju don bynta ha ki kam ilekshon.
“Kum ka Jaidbynriew, ngin jied ia ka party ne kyrtong kaba ngeit ha ka riti synshar ka ri, burom ia ki kyndon ka riti synshar ka ri India, kaba ngeit ia ka jingburom ia baroh ki jaid niam bad ka party kaba iada ia ka hok ki rit paidbah. Kumta phim lah ban khmih lynti ba kum u Khristan, ngan vote ne jied ia u briew u ba dei na ka party kaba ieng pyrshah ia ka riti synshar ka ri, ka bym burom ia kiwei ki niam bad ruh kaba buh jingma ia ki rit paidbah jong ka ri” la ong u Bah Ardent.
U President ka VPP ula kam ba kane ka jingkren u Himanta kadei tang ka jingialam bakla ia ki paidbah bad wanrah ia ka jingsngew iapher hapoh ka Ri bad kala wanrah ruh ia ka jinglehrain ia ki paidbah ka Assam.
