Hadien 21 sngi, ki Nongtrei lane SSA Non-Teaching Staff ki la weng noh ia ka jingiakhih shong kyllain mungor na Madan Malki hynne ka sngi. Ka jingweng noh ia ka jingiakhih ka dei hadien ba ki Nongtrei lane SSA Non-Teaching Staff ki la pdiang bad hun ia ka jingkyntiew tulop ba 2% bad ka 5% Increment man u snem. Ïa kane la rai hadien ka jingïalang jong ka Rationalization Committee ba la pyniaid da u Commissioner & Secretary ka Education u Vijay Mantri, kaba la long ha ka 19 tarik u Nailar.”Hadien ba ngi la iashong biang hynnin ka sngi ia ka jingialang jong ka Rationalization Committee bad u Commissioner Secretary ka that Pule Puthi. Ngi la ioh ia ka jingdawa jong ngi, kata 2% katkum ka Seniority Wise bad 5% ka jingkyntiew tulop kaba man u snem” la ong ka President ka Kong Jenifer Syrnem.
Ka la bynrap ka Sorkar ka khlem ai ia ka 80% kumba ki dawa hynrei ki Nongtrei lane SSA Non-Teaching Staff ki hun namar ka la ioh ban pynbeit ia ki kynrum kynram jong ka Base Pay jong ki Nongtrei. “Mynshwa kiba wan thymmai ruh ki ioh ka juh ka tulop, kiba la trei 18 snem ruh ka juh ka tulop hynrei mynta lyngba ka Rationalization pat, ngi la ioh ia ka tulop bapher bapher bad la niew lang ruh ia ka Seniority Wise jong ki Nongtrei” ka la ong. Lah ban kdew ba ka Sorkar Jylla ka la mynjur ia ka jingai jingmut jong ka Committee ba ka pynshong nongrim ia ka jingsiew ba thymmai kan sdang treikam noh naduh 1 tarik u Iaiong.
“Baroh ki nongtrei kiba la don lypa, ki la pyrkhat ban pynkiew da 2% katkum ka Seniority Allowance man ka snem ka jingshakri ba la ai naduh ka 1 tarik u Iaiong, 2024,” la ong u Vijay Mantri. Ka Committee ka la ai jingmut ruh ba ia ka jingtip baroh ia ki nongtrei dei ban pynshisha bha na ki ophis jong ka District shwa ban phah ia ka jingtyrwa kaba khatduh. Ia kito ki Nongtrei kiba khlem pat kynthup ruh dei ban shim jingkhein lang noh ha shuwa ban buh ia ka jingtyrwa kaba khatduh sha ka Tnad.
