Ka National People’s Party (NPP) ba la ïalam da u Myntri Rangbah ka Jylla Meghalaya, u Conrad Sangma, kaba don 7 ngut ki MLA ha Manipur ka la weng noh ïa ka jingkyrshan ïa ka sorkar ba la ïalam da ka BJP jong u Myntri Rangbah N Biren Singh, da kaba kynthoh ïa ka jingbym sngewhun ïa ka rukom pynïaid bad jingbymlah u Myntri Rangbah ban weng ga ki kynrum kynram jingkynad kiba dang jaitbynriew kaba dang iai bteng shakhmat ha Manipur bad ka jinglong jingman suk ka saiñ kaba la nang sniew. Ha ka jingpyntip sha u president jong ka BJP u JP Nadda, u Conrad Sangma u nongïalam ba ha khliehduh ka seng NPP bad uba dei ruh u Myntri Rangbah ka Jylla Meghalaya u la pynbna ïa ka rai jong ka seng jong u ban weng noh ïa ka jingkyrshan jong ki 6 ngut ki MLA ka seng na ka kynhun synrop jong ka sorkar Maninpur ba la ïalam da ka BJP bad ïalam da u N Biren Singh. Ka shithi ka la pynpaw ïa ka jingsngewkhia kaba jur halor ka jingbym lah jong ka sorkar jong u Myntri Rangbah ka Jylla N. Biren Singh ban pynphai biang ïa ka jinglong jingman ban weng ia ki jingeh bad ka jingkynad kiba dang bteng shakhmat.
Katkum ka kyrwoh na u National President ka NPP u Conrad K Sangma u la pyntip ba ka seng ka dap da ka jingsngewkhia kaba jur halor ka jinglong jingman ha ka jylla Manipur. “Ha kine ki sngi kiba la dep, ngi lah iohi ia ka jinglong jingman kala nang sniew shuh shuh ha kaba la duh ia ki mynsiem kiba lui lui bad ki paidbah ka jylla kila mad ia ka jingeh kaba khraw” la pynpaw u Conrad. “Ka jinglong jingman ha Manipur ka la nang kiew shabar jong ka jingpyniaid, ha kaba ki jingim bym don pop ki la duh bad ki paidbah ki la shah shitom. Ngi ngeit skhem ba ki nongialam ba mynta kim shym la lah ban weng ia kine ki mat kiba kongsan,” la ong ka shithi.Wat hapdeng ka jingweng noh jong ki hynriew ngut ki MLA jong ka NPP, hynrei ka sorkar ba la ialam da ka BJP ha Manipur ka dang don ha ka jingshngain. Da ka jingbun paid kaba suk kaba long 37 tylli ki seat ha ka ïingdorbar kaba don 60 ngut ki dkhot, ka BJP ka don sha bun paid palat ïa ka dak kaba shiteng jong ka 31 ngut.
Nalor kata, ka BJP ka dang bteng ban ïoh ïa ka jingkyrshan na ki paralok jong ka bad ki riew MLA shimet, kynthup- ka Naga People’s Front (NPF) kaba don phra ngut ki MLA, uwei u MLA jong ka seng JD(U), bad lai ngut ki MLA shimet. Ki hynñiew ngut ki MLA ka NPP kaba don ha ka sorkar synrop ba mynshwa bad kiba la weng noh ka jingkyrshan mynta ka kynti ki long – Sheikh Noorul Hassan jong ka Kshetrigao Assembly Konstitwensi; Khuraijam Loken Singh jong ka Wangoi Assembly Konstitwensi; Irengbam Nalini Devi jong ka Oinam Assembly Konstitwensi; Thongam Shanti Singh jong ka Moirang Assembly Konstitwensi; Mayanglambam Rameshwar Singh jong ka Kakching Assembly Konstitwensi; N. Kayisii jong ka Tadubi Assembly Konstitwensi bad Janghemlung Panmei jong ka Tamenglong Assembly konstitwensi. Ka Manipur ka dang ïakhun pyrshah ïa ka jingshah thombor bad jingkynad jaitbynriew kaba la pynkynriah ïa ki hajar ngut bad kaba la pynlong ïa ka jinglong jingman kaba sniew ha kylleng ka jylla. Ka jingmih noh jong ka NPP ka pynlong ïa ka jingbym thikna ha ka saiñ pyrthei ha ka jinglong kaba la tyrkhong lypa.
