Ka Voice of the People’s Party (VPP) ka la weng noh shipor ia ka jingiakhih hadien ba ka Myntri ka tnat kam ain ka Kong Ampareen Lyngdoh ka la kular ban iakren ia ka jingdawa ka VPP ha ka jingialang bad u Myntri Rangbah u Conrad Sangma, u Chief Secretary bad kiwei ki ophisar ryngkat ki nongialam ka VPP. Ia kane la pynbna da u President ka VPP, u Bah Ardent Miller Basaiawmoit hadien ka jingialang bad iakren sngewthuh jingmut bad ka Myntri ka tnat Ain ka Kong Ampareen Lyngdoh hynne ka sngi. Shuwa kane, ka la don ka jingiapynibor bad nia hapdeng u Bah Ardent bad ki Pulit ha ka jingialam u Superintendent of Police (SP City) u Vivek Syiem hakhmat ka Ophis BSNL. Naduh dang step ki Pulit ki la pynjur ban pahara naduh Civil Point, Kachari bad la iohi ruh ba ki Pulit ki la kylli ia ki briew kiba iaid bad ia ki kali kiba mut leit sha thain Secretariat. Hadien ka jingthmu ki nongialam ka VPP ban tur sha Secretariat, ka Myntri Sorkar Jylla ka Kong Ampareen Lyngdoh ka la khot syndon ia ki nongialam ban iakren. Ka VPP ha ka jingialam u President u Bah Ardent Miller Basaiawmoit ha ka jingdonlang ki MLA kynthup u Bah Heavingstone Kharpran bad u Bah Albert Nongrum ki la kynduh ia ka Myntri ka tnat Ain ka Kong Ampareen Lyndgoh.
Haba kren sha ki lad pathai khubor hadien ba wai ka jingialang, u Bah Ardent ula ong ba ka Lokayukta ka dei na ka bynta ban tohkit ia ki bamsap bad dei namar kane lada don ba ktah ia ka rukom treikam jong ka Lokayukta, ka VPP kan mih madan ban iakhih. U Bah Ardent ula kam ba katkum ka Notification ba la pynmih da u Chairman ka Meghalaya Lokayukta ka kdew shai ba la weng ia ki 3 ngut ki Ophisar ka dei katkum ka jingbthah (Instruction) jong ka Sorkar Jylla. “Ka Myntri ka tnat Ain kam lah ban shim rai hynrei na ka liang ka Party ka sngewkhia bad dei namar kane, ka Party ka la leit ban iakren bad ka Myntri Sorkar” la ong u Bah Ardent.
U Bah Ardent ula pyntip na ka liang ka Myntri ka la ban jur ia kane donkam ban iakren ha ka jingdonlang u Myntri Rangbah ka Jylla bad u Chief Secretary ha ka jingdon lang ki heh na ki tnat Sorkar. “Kumba ka la ong, kan don ka jingiakren ban don da ka jingialang hapdeng ka jingdon u Myntri Rangbah ka Jylla, ka Myntri ka tnat ain, u Chief Secretary lem bad ki heh na ki tnat Sorkar” ula ong. U Bah Ardent ula iathuh ba ka Myntri ka tnat Ain, ka Kong Ampareen ka la pan por na ka VPP ban pynbeit ia ka jingialang bad u Myntri Rangbah ka Jylla. “Kane ka jingiakhih ban dawa thungkam biang ia lai ngut ki ophisar kam pat kut, hynrei na ka liang ka VPP kan sangeh shwa shipor tad haduh ka jingialang bad u Myntri Rangbah bad hadien ka jingialang ka Party kan sa shim ia ka rai” la bynrap u Bah Ardent.
+ There are no comments
Add yours