Ka jingieng skhem ka Dorbar Shnong Mawsynram ban khang pyrshah ban leh niam ha Krem Mawjymbuin̈ ka la pynlong ia ka Yatra Committee hynne ka sngi, ban pyntip sha ka iing kashari Meghalaya High Court ba ka la pynsangeh noh ia ka jingthmu ban pynlong ia ka Yatra jong ka. U Nongiasaid Aiñ uba mihkhmat ia ka Dorbar Shnong Mawsynram u Bah VGK Kynta ula ong, ba Society ka la pyntip ha ka iing kashari ba ka la pynsangeh noh ia ka Yatra. “Ka Committee ka la pyntip hapoh ka iing kashari ba ka la pynsangeh noh ia ka jingthmu ban pynlong ia ka Yatra hynrei kam shym la weng noh ia ka jingujor mukotduma jong ka” la ong u Bah Kynta. Ula iathuh, na ka liang ka Dorbar Shnong ka la ai jingmut ia ka iingkashari ban thaw ia ka committee ban peit bad kyntiew ia ka krem Mawjymbuin kum ka jaka jngohkai ka ban khring ia ki nongjngohkai bad kumjuh ruh ban pynneh ia ka khuid ka suba katei ka krem bad na ka liang ka iingkashari ka la pdiang ia katei ka jingai jingmut.
U Assistant Rangbah Shnong ka Mawsynram u Bah Hiamdor Rapsang ula ong, ba ka krem Mawjymbuiñ ka dei ka jaka jngohkai bad ka Dorbar Shnong ka pdiang sngewbha ia ki briew ba kin leit ha katei ka krem kum ki nongjngohkai bad kam don satia kano kano ka jingkhang ia ki. U la ong kaba ka Dorbar Shnong ka khang pyrshah ka long ban lehniam ha katei ka krem bad ka shnong kan ym ailad iano iano ruh ban pynlong ne pynkylla ia ka Krem Mawjymbuin kum ka jaka lehniam. U Bah Rapsang ula pynpaw ia ka jingkmen ba ka kynhun kaba thmu ban pynlong ia ka Yatra kala pyntip sha ka iingkashari ba kala pynsangeh noh ia ka Yatra ka jong ka.
Kumban shu pynkynmaw, hadien ba ka Dorbar Shnong Mawsynram kala khang pyrshah ban pynlong ia kano kano ka jinglehniam ha Krem Mawjymbuin kumta na ka Liang ka Hindu Society kaba thmu ban pynlong ia ka Yatra sha Krem Mawjymbuin kaba ki ngeit ba utei u Maw uba don hapoh ka krem u iasyriem bad u Shova Linga, kala leit ujor da ka mukotduma ha ka iingkashari Meghalaya High Court. Ka iingkashari kala shong tian bishar ha ka 9 tarik u Nailar bad kala bthah ia ka dorbar shnong Mawsynram ban pynbeit ia kane ka kam da kaba iakren da ka jingiasngewthuh jingmut bad kala buh tarik ban shong bishar biang ia ka mukotduma ha ka 14 tarik u Nailar hynrei ha kane ka sngi, ka Hindu Society kala pyntip ha ka iingkashari ba kala pynsangeh noh ia ka jingthmu ban pynlong ia ka Yatra.
