Ka Kong Bindas Syiem ka la pynbna ba la weng ia ka jingshah thngan hadien ba ka la ioh ka jingkular ba ka Sorkar kan sa maramot noh ia ka surok Nongpoh-Umden-Sonapur.
Ia kane ka rai ka Kong Bindas ka la pynbna hadien ba wai ka jingialang bad u Symbud Myntri Rangbah ka Jylla u Bah Prestone Tynsong uba khmih ia ka tnat PWD (Road) ka Jylla.
“Nga pynpaw ka jingsngewkmen bad ka jingsngewnguh kaba khraw ia ka Sorkar ha kaba la pynsngap ia ka jingdawa jong nga ban maramot bad shna pynbha ia ka surok Nongpoh-Umden-Sonapur” la ong ka Kong Bindas.
Ka Kong Bindas ka la ong, “Nga la ioh ka jingkular (Assurance) ba biang ba ka Sorkar ka la ai katkum ka jingkwah jong nga”.
Nalor kane ka Kong Bindas ka la ai khublei ia baroh ki paidbah kiba la wan kyrshan ha ka jingshah thngan na ka bynta ka bha ka miat u paidbah.
Lah ban kdew ba kane ka dei ka sngi ba 5 ba ka Kong Bindas Syiem ka jingshah thngan ha jaka ieng kali ha Additional Secretariat Shillong ban dawa maramot ia ka surok Nongpoh-Umden- Sonapur.
Ha ka jingialang bad u Symbud Myntri Rangbah, ia ka Kong Bindas la synranlang da ki nongialam ka KSU North Khasi Hills, HYC, HITO, Seng Samla Umden bad Synjuk Rangbah Shnong Ri-bhoi district.
Haba iathuh halor ka jingialang u Symbud Myntri Rangbah ka Jylla u Bah Prestone Tynsong ba peit ia ka tnat PWD (Road) u la ong, “Ia kane ka surok yn shna noh mynta u snem 2024”.
U Bah Prestone ula iathuh ha ka jingialang ula kyntu ia ka Kong Bindas ba kan weng ia ka jingshah thngan bad ula bynrap da kaba ong, “Na ka liang jong ka ruh ka la mynjur ia kane”.
