Kumba ju long man u snem ban pynithuh ithaw para samla pule bad ban pynneh ia ka jingiatylli hapdeng ki samla pule ka Regional Institute of Science and Technology (RIST) bad ka University of Science and Technology Meghalaya (USTM) sa shisien pat ki la ioh ban pynlong ia ka jingiakynduh lang lane ka Freshers Meet ba la pynlong kyrpang da ka Khasi Students Union RIST-USTM unit. Ha katei ka programme jong ki samla pule ka RIST-USTM, la wan ban pynshngainlang bad ban ai mynsiem da ki nongialam ka Khasi Students Union, North Khasi Hills District, ba kynthup naduh u Bah Ferdynald Kharkamni, President, Samla James Hitlar Mawphniang, General Secretary nalor kiwei kiwei ki nongialam kynthup ki nongialam ka KSU RIST-USTM Unit.
Haba kren ai mynsiem ban pynrhem ia ka mynsiem ki samla pule kiba dei ki Khasi Jaintia, u Bah Ferdynald Kharkamni bad u James Hitlar Mawphniang, ki la pynpaw ia ka jingsngew sarong ba kum ki samla pule kiba napoh ka dong ka thaiñ ka jylla Meghalaya ki long kiba kloi ban wan shakhmat ban pyni ia ka mynsiem jingiatylli lang ha kawei ka lama jong ka seng ki samla pule kata ka Khasi Students Union. Ki la ong ruh, ba kum ki samla pule ki dei ban don ia ka thong ban long briew man briew bad kam don kano kano ka jingeh ia ki ban kot shata haba ki don ia ka mon kaba jwat bad ban kiar na ki jingshah ialam bakla, kum ki samla ki dei ban tip ban ri kyndong ia la ka riti dustur, ka akor burom bad ka jinglong tynrai khlem da bud tynneng ia ki rong phong pyrthei bad ban treishitom ban kot sha ka nam jong ka jingjop.
“Phi dei ban long kiba la kloi ban peit lem ia ki jingeh ne kino kino ki jingbym ia sngewthuh jingmut ha ki jaka pule ba phi ia don bad ba phin kitkhlieh ruh ia ka bha ka miat bad ka jingiaieid para samla pule”, ong ki nongialam. Ha kane ka sngi, nalor ki prokram kiba la pynphuh pynphieng ia kane ka jingiakynduh lang jong ki samla pule, ka KSU ka la pynthymmai ruh ia ki nongkitkam ka KSU RIST-USTM Unit na bynta u snem 2024-25 ia kaba la pynskhem ruh da ki nongialam.
