Namar ka Model Code of Conduct (MCC) ka dang treikam haduh mynta namar ilekshon Lok Sabha 2024 ka dang iaid, ka Captain Williamson Sangma State University kam lah ban thung ia u Vice Chancellor (VC) ba pura ban treikam ia kane ka skulbah ba nyngkong jong ka Meghalaya. Lah ban kdew ba ia ka skulbah banyngkong ka Jylla Meghalaya, kata ka Captain Williamson Sangma State University ka don ha ka shnong Balalgre, South West Garo Hills bad la plie ha ka 14 Kyllalyngkot, 2023.
Haba pyrshang ban wad bniah, haduh katno ka Captain Williamson Sangma State University ka la treikam, u Myntri ka tnat pule u Rakkam A Sangma ula ong “Namar ba dang treikam ka MCC, Ngim pat lah ban thung VC ba pura hynrei jan baroh ki jingdonkam ki la dep lut”. “Hadien ba kut noh ka jingtreikam ka MCC, Ngin sa thung noh u VC ba pura hapoh ka Captain Williamson Sangma State University ban pyntyllun ia ki kam” ula ong.
Kum ban shu kdew ka jingdon ka skulbah ba pura hapoh ka Jylla kan iarap ia ki samla pule ba kwah ban iaid shakhmat ban pule namar kim da donkam shuh ban ialeh eksamin Common University Entrance Test (CUET) namar kiwei ki College jong ka Jylla kin hap noh hapoh kane ka skulbah khlem da iaid lyngba shuh na ka skulbah Sorkar Pdeng kata ka NEHU.
