Ngim dei ban pyrkhat tang ban pdiang sngewbha ia ki nongwan jngohkai pyrthei hynrei ngi dei ruh ban pyrkhat ia ka jingleit phai ki nongwan jngohkai pyrthei napoh Meghalaya sha la ki Jylla ne ki Ri ba ki wan. Ia kane la pynsngew da u MLA ka United Democratic Party (UDP) na Sohiong u Bah Synshar Kupar Roy Lyngdoh Thabah haba iashim bynta ha ka jingiatai lyngkot ba la wanrah da u MLA ka Nongpoh u Bah Maryralborn Syiem halor ka jingkyntiew ia ka kam jngohkai hapoh ka Jylla. Haba kren hapoh ka iingdorbar u Bah Synshar ula ong, “Ka Meghalaya ka dei ka Jylla kaba itynnad palat bad kaba lah ban khring bha ia ki nongwan jngohkai pyrthei na kylleng ka Ri India bad na shabar Ri. Nga sngewthuh ba ki jait prokram ba ka tnat Tourism ka la pynbna dang shen kan khring shibun ki nongwan shangkai na kylleng ka Ri bad ka pyrthei”. U Bah Synshar ula kam ba ki nongwan shangkai hapoh Meghalaya ki donlang ki briew kiba wan lyngba ka lynti kaba dei (Legal) bad kiba wan da ka lynti bad ka jingthmu ka bym dei (Illegal).
“Nga sngew ba ka tnat Tourism kam dei ban pylleit jingmut tang ia ki jaka rung bad ka rukom rung ki nongwan jngohkai hynrei ka dei ruh ban pynthikna ba ki nongwan jngohkai pyrthei ki dei ban leit phai noh sha la ki Jylla ne ki Ri hadien ba kut ka sngi wan jong ki” u la ong. U Bah Synshar u la ong, lada ka Sorkar kam shimkhia halor kane ka jingwan tuid, ki briew hapoh ka Jylla, kane ka ktah ia ka jingbun paid ki trai shnong jong ka Meghalaya. U MLA ka Sohiong u la ai nuksa ba kiwei ki Jylla kum ka Mizoram Nagaland, Arunachal Pradesh, Manipur bad ka Sikkim ki don da ki ain ba kyrpang ban peitngor ia ka jingrung jingmih ki briew na kiwei ki Jylla, la ki dei ki nongwan jngohkai pyrthei ne ki nongwan bylla.
“Kine ki Sorkar Jylla ka thain shathei lammihngi, ki don ka ain ha kaba ki briew na kiwei ki Jylla ki donkam ban shim jingbit na ka Sorkar da ka ba pyndap ia ki Form lyngba Offline ne Online ha shuwa ban rung sha ki Jylla. Ha kine ki Form ki briew ki donkam ban pyndap ia ka tarik, jaka sah, lano kin leit phai bad ki kam shah pynngat ain (Lada don) bad hadien ba la bishar bniah iaki Form, kin sa lah ban rung sha kine ki Jylla bad lada lap ba ki pynkhien iaki kyndon, kin shah pynshitom katkum ki kyndon ain” u la bynrap. Haba pynksan ia ka jingdonkam ban don da ka ain ban peitngor ia ka rung ka mih ki briew na kiwei ki Jylla sha Meghalaya, u MLA ka Sohiong u la ong “Ka Jylla ka don hapdeng ka jingkyrduh kam bad kane ka lah ban dei namar ka jingioh rung laitlan ki briew sha Meghalaya bad namar ka jingbym don ka jingpeitngor iaka jingleit phai jong ki, kine ki briew kiba wan beain, ki sdang ban trei haki jaka shna jingshna, ki karkhana, ki dukan, ki jaka tih mar poh khyndew bad kane ka long kumba ki knieh iaka kamai kajih ki samla trai Ri”.
