Ka wah Myntdu kaba ker talawiar ia ka shnong Jowai dei kawei na ka wah kaba donnam bad kaba bsa umbam umdih ia ki paidbah nongshong shnong ka Jowai, kumjuh ruh ia ki nongrep ha Pynthor Neiñ bad Pynthor Wah, mynta ka kynti la i sangsot ban peit ia ka jinglong jingman jong kane ka wah namar ba ka jingshah ktah jingshah pynjulor jong ka ka la long shaba palat pud, bad ki dak ki shin jong ka jingshah ktah jong ka ki la poi ruh ha man ki thliew ïing ka shnong Jowai kiba pyndonkam umbam umdih na kane ka wah namar ba ka umktieh kaba jnah ka la kiew syndon ha ki top um bad khiew pyllang um jong ki paidbah nongshong. Haba leit sakhi iaka jaka pyllang um ka tnat PHE ha Khimusniang Jowai ha ka 23/05/24 kaba dei ruh ka jaka ba pynkhuid ia ka um ba wan na ka wah Myntdu bad wah Umngot shwa ban sam sha ki paidbah, na ka liang u SDO ka tnat PHE Electrical Division u Roskil Challam u iathuh ba na ka liang jong ki ki la ialeh katba lah ban pynkhuid ia ka um kaba poi ha kane ka jaka mynta la ar taiew ban pynkhuid ruh ia ki top pyllang um ba tip kum ki Segmentation Tank, ki clear water tank nalor ki Main Reservoir ba don ha Government Boys HS School Jowai bad ha Dongmihsngi, Jowai, hynrei kim lah shuh ban leh ei ei. Watla katta ruh kin dang iaid bteng ban pynkhuid sa ia ki top um ba don sha man ki dong ki shnat.
U ong ruh ba manla u snem haba poi u slap ba nyngkong ka um kajuh ktieh hi, hynrei ka long suk pat ban pynkhuid ym kum mynta u snem ba la poi beit da ka umktieh.Haba phai pat shaki daw kaei ba pyllong iaka wah Myntdu ban shah ktah haduh katte, la sakhi ba dei naka jingleh hi ki paidbah ha kaba tang ban lait na rymbei lajong bret jaboh pyntuid jakhlia shaka wah kim salia, bad ruh tang ban myntoi shimet bret khyndew haka wah kim salia.Halor ban iada iaka wah Myntdu jingshisha naduh u snem 2017 lyngba ka jingujor u Saje Laloo pyrshah iaka sorkar Jylla, ka NGT kala pynmih iaka hukum ba ymbit ban pynjakhlia ne pynjulor iaka wah Myntdu da kino kino ki rukom, ne ban tei kino kino ki jingshna harud jong ka kumba 50 meter, bad naka liang u DC ka West Jaiñtia Hills District ruh naka por shaka por ula pynjari daki kyndon 144crpc ha shi lynter ka wah Myntdu kynthup naduh ka jingkhang ban bret jakhlia, bret ñiut, bret khyndew, khlong shyiap khlong maw bad kiwei hynrei ka jingpynshitom ia kiba leh pyrshah pat kam long salonsar.
Haba iadei bad kane naka liang u K.L.Pariat President ka seng “Khoid Yaka Wah Myntdu” kaba dei ka seng ba peitngor kyrpang naka bynta ka bha ka miat jong ka wah Myntdu kaba la iaid lynti naduh u snem 2021, u ong ka jingjia iaka wah Myntdu mynta dei kaba la iohi jngai naduh ki snem ba shadien bad naka liang jong ki naka por shaka por kila iakren bad u DC ka WJHD halor ki jingma ba ap ia kane ka wah, hynrei ki tnat treikam sorkar kynthup iaka PWD, Water Resources ki shu kut tang ha kaba leit jngoh ia kane ka wah bad ia dihsha khem kino kino ki kam. Ha u snem 2021 haka por ba trei pynheh ia u surok Jowai Amlarem road daka Dhar Company la don ka jingiakren ka seng “Khoid Yaka Wah Myntdu” ba ymdei ban bret khyndew shaki bynta ba tuid shaka wah Myntdu bad u Contractor Ngaitlang Dhar ruh ula kular, hynrei pynban ha kane ka kynti ka juh hi ka Company kala bret syndon hapoh wah iaki khyndew lyngba ka jingpyntrei thymmai jong ka ia u surok ba pyniasoh na jingkieng Treïongriang ha Khliehtyrshi, bad na kane ka daw la nangjur ka jingshah ktah ka wah Myntdu. Ong u K.L.Pariat. Kumba long mynta u ong ba kim don jingshaniah shuh ia ka ophis u Deputy Commissioner namar ba watla ka hukum ka NGT ka la don lypa ruh ym shym la iohi ia ki kam. Bad kaba sah mynta ka long lada ym pynkhuid shi syndon ia ka wah bad sangeh ruh ka jingpyntuid khyndew lah ban wan jia khlam lyngba ka um da ki jingpang ba bunjait, nangta ka jingkyrduh um ki nongrep ki nongshong shnong ka Jowai ha ki snem ban wan, bad halor kane ka sorkar ka dei ban shim jingkitkhlieh.
