Kum shi bynta ka jingpynkhreh iaka 6th Meghalaya Games ka ban sa long ha Jowai, West Jaiñtia Hills District ha u snem 2025, hynne ka sngi u myntri ka tnat Sport & Youths Affairs ka sorkar Jylla u Shakliar Warjri ryngkat bad u MLA ka Jowai u Wailadmiki Shylla, ki dkhot ka Meghalaya State Olympic Association, ka State Sports Council bad ki bor District West Jaiñtia kila pynlong ka jingiakynduh lang bad ki ophisar jong ki tnat treikam sorkar bapher bapher ka District naka bynta ban iamir jingmut halor kumno ban pynlong ia kane lympung ialehkai kaba jop bad kaba ai jingmyntoi shisha iaki khun samla kiba don iaka sap ialehkai sports bapher bapher.
Haba iakren bad u Myntri Shakliar Warjri hadien ka jingialang ba la pynlong ha conference hall ka ophis jong ka tnat soil and water conservation Jowai, u iathuh ba kawei naki jingtei jingshna ban wanrah haka district dei ka swimming pool, katba naka bynta kiwei pat ki jingialehkai yn sa shna pynbha pynmiat haki jaka bala don lypa kiba la dep jied. U ong ruh ba ka jingwan kane ka Meghalaya Games kan long ka jingmyntoi iaki skul ki college namar ba iaki jaka bala jied ban pynlong ki jingialehkai yn sa pynbit pynbiang bad shna pynbha iaki. Kaba mut hadien bala kut ka jingialehkai kan long ka jingmyntoi jingiohnong iaki hi namar kin sa ioh pyndonkam ialade.
Haba iadei pat bad ki jingduna haka Meghalaya Games bala dep u ong, ba ia kane la shim ba ka dei ka jinghikai naka bynta ban nanglah pynbha shakhmat. Nangta haba phai shaki jaka sah pat u ong ba ka West Jaiñtia Hills dei kaba lah biang tam namar ka don bun ki skul, ki college bad guest house naduh kiba dei jong ki riew shimet ne jong ka sorkar. Shuh shuh u myntri u iathuh ba haka Meghalaya Games ban wan ki kwah ban kynthup iwei ne ar jait ki jingialehkai naka bynta kiba duna dkhot met, namar ki kwah ba maki ruh kin ioh bynta haka Meghalaya Games.
