Ka sorkar jylla ka la don ka jingthmu ban buh noh da ka Police Station ha Umtyngar, khnang ban don ka jingshngain ia ki paidbah nongshong shnong bad kumjuh ia ki nongjngoh kai pyrthei. Ka shnong Umtyngngar ka don ha ka surokbah ban leit sha Pynursla-Dawki bad sha Sohra. Lah ban kdew ba dang shen,ki kali kit nongwankai nabar jylla, ki la shah bat ha ka sengbhalang, kane ka la pyllong ia ka sorkar ban wanrah da ka Police station ha katei ka jaka ha ka 12Mer, markhap bad ka Umtyngngar. Haba kren bad u Rangbah Shnong ka Umtyngngar u bah Charles Kharkongor, u la ong ba watla um pat ioh kano kano ka jingtip na ka sorkar, hynrei ula kubur ba ula shu ioh sngew na kiwei halor kane ka jingthmu ka sorkar ban buh noh da ka Police Station ha kane ka shnong.
U bah Charles u la ong ba ma u shimet, u sngew ba ka sorkar ka dei ban iasyllok bha bad ki nongialam shnong katei ka thain halor kane namar ba ioh kan wanrah pynban ka jingwit ia ka shnong lada wanrah ia ka police station. Na ka liang jong u, lada kan wan ka jingpyntip na ka sorkar, un iasyllok shwa ha ka Executive Committee ka shnong watla ha ka jingsngew jong u shimet, kan kham bha namar ba kumba long mynta, kin lait ban leit donkam shaduh Mawngap Police Station lada don kano kano ka kam.
“ Na ka liang jong nga shimet, sngew kam suk lada don ka Police Station. Hynrei shi bynta ngi don ka jingsngew ba lada don ka Police Station hangne, ioh shu duh noh ki bor shnong namar lada mih kiei kiei ha shnong ha thaw , ioh shu poi beit beit noh sha ki pulit,” ong u Rangbah shnong. Lah ban kdew ba ha ki khyndiat ba la dep, u MLA ka Sohra u bah Gavin M Mylliemngap lem bad ki ophisar ka tnad pulit, ki ophisar na ka PWD, kila hiar sha Umlympung Khatarmer markhap bad ka shnong Umtyngngar ban peit ia ka jinglong jingman jong ka jaka ban buh ia ka Police Station. Katei ka jaka ka dei u pud u sam jong lai tylli ki Police Station kynthup ka Mawngap Police Station, Pynursla Police Station bad ka Sohra Police Station.
