Ka Sorkar Jylla ka la rai ban iakren bad ka Sorkar Pdeng bad ka National Testing Agency (NTA) hadien ba mih ka kynrum kynram ha ka por pynlong ia ka eksamin Common University Entrance Test (CUET) ha North-Eastern Hill University (NEHU).
Ia kane la pyntip da u Myntri ka tnat Pule u Rakkam A Sangma hadien ka jingialang hapdeng ka Sorkar Jylla, ki bor pyniaid ka NEHU bad NTA.
Ia kane ka jingialang la pyniaid da u Myntri Rangbah ka Jylla u Conrad Sangma.
Haba kren sha ki lad pathai khubor u Rakkam ula ong ba ha ka jingialang u Myntri Rangbah ula pyntip ba ka Sorkar Jylla ka la shimkhia ba mih ka kynrum kynram ha ka por pynlong ia ka eksamin CUET ha NEHU.
“Namar kane, ka Sorkar Jylla lyngba u Myntri Rangbah kan iakren halor kane bad ka Sorkar Pdeng bad ka NTA ban shim ki sienjam halor ka kynrum kynram ha ka por pynlong eksamin CUET” la ong u Rakkam.
Haba iathuh halor ka kynrum kynram ba mih ka kynrum kynram, u Rakkam ula iathuh ba ka daw kadei hi namar ka NTA ka pyntip die por palat iaka NEHU ban ai jaka ban pynlong eksamin iaki 4000 tam ngut ki samla pule.
U Myntri ula ong, ka Sorkar Jylla kam don bynta ha ka ban pynlong ia ka eksamin CUET bad ula kynthoh ia ka NTA da ka ba ong “Ka NTA kam shym la long kaba la pynkhreh namar ka khlem pyntip wat ia ka Sorkar Jylla ne ia ki bor District ban ai jingiarap ha ki jaka pynlong eksamin”.
“Ki don palat 4000 ngut kiba thoh eksamin ha NEHU hynrei ki kor Biometric ki don tang 7 tylli. Ha ka jingshisha na ka bynta ki hajar ngut ki briew ka NTA ka lah dei ban pynbiang 40-50 ki Biometric” ula ong.
Haba kylli ia ka lawei ka samla ba duh thoh eksamin, u Myntri ka tnat Pule ula ong baka Sorkar Jylla kan sa thoh sha ka Sorkar Pdeng bad NTA ban shah ia ki samla pule ba shah ktah namar ka kynrum kynram ha ka por pynlong eksamin CUET.
