Ki don katto katne ki Nongialam ka Congress bad TMC ki ban pyniasoh ia lade sha ka Voice of the People’s Party (VPP). Ia kane la kam da u Nongialam ka National Peopple’s Party (NPP) uba dei ruh u Mynri Sorkar u Rakkam A Sangma, halor ka jingiohi ba ka VPP ka la sdang ban bsuh khlieh sha Garo Hills. Haba kren sha ki lad pathai khubor, u Rakkam ula kubur ba kane ka jingsdang jong ka VPP ban leit sha Garo Hills ka dei hi namar ka jingioh mynsiem hadien ba ka Party ka la sar ha ka ilekshon MP na Shillong Seat.
“Hoid nga la iohi ba ki (VPP) ki la sdang ban leit sha Garo Hills, Hoid kane kan long ka jingiatynjuh bad kiwei ki Party ha Garo Hills khamtam bad ngi ka NPP namar nga la ioh khubor ba ki don ki Nongialam na ka Congress bad TMC ki ban pyniasoh ialade sha ka VPP” la ong u Rakkam.
U Rakkam ula ban jur ba ki sengsain pyrthei kim dei ban don beit tang ha kawei ka thain ne ban pynleit jingmut tang naka bynta kawei ka jaidbynriew hynrei kidei ban don lut ha baroh ki kyndong, kynshrot jong ka Jylla ne ka Ri.
