U myntri ka tnat jngohkai pyrthei u Bah Paul Lyngdoh ula pyntip ba ka sorkar Jylla kan iatreilang bad ka sorkar Japan ban pynlong ia ka Cherry Blossom 2024. Haba kren sha ki lad pathai khubor u Bah Lyngdoh ula ong, kane ka dei ka jingai jingmut da u Ambassador Japan sha India ha ka por ba u wan jngoh ha nongbah Shillong ha u snem 2023. “U nongmihkhmat na Japan ula sngewkmen bad itynnad ia ka jingsyriem jong ki syntiew Cherry ba thung hangne bad ki syntiew Cherry ha Japan bad kumta ula ai jingmut ba ka Japan ka dei ban long shibynta ha kane ka tamasa bad kane ka long kum ka jingiakylliang hapdeng ka Meghalaya bad ka Japan” la ong u Lyngdoh.
“Kaba kham pher ka Cherry Blossom mynta u snem ka long ba ngin iatreilang ruh bad ka Sorkar Japan bad kan don ka jaka ba la buh kyrpang na ka bynta ka Sorkar Japan ban pyni ia ki kam bapher bapher jong ki ka ri ba la paw bha” u la ong. U Bah Paul ula pyntip nalor ka Cherry Blossom, ka tnat ka dang pynkhreh ia kiwei pat ki prokram bad ki tamasa na ka bynta ka Cherry Blossom 2024.
“Ngin sa shim por katto katne namar katto katne ki prokram bad ki tamasa kin long ha ka kyrdan district bad katto katne ha ka kyrdan jylla bad katto katne kin long ha la ki jong ki jong ki shnong” u la bynrap.
