Yn kem bad pynshitom katkum ka ain, kiba donkti pyniap nongbylla bar jylla:Conrad

U Myntri Rangbah u Conrad K Sangma ula pyntip ba ka Sorkar Jylla ka la shim khia halor ka jingshah thombor ki nongtrei bar Jylla kaba la jia Mawlai Mawroh. Lah ban kdew ba haka 10 tarik mynta u bnai ka kynhun runnar ba tap durkhmat ki la wan thombor ia 2 ngut ki nongbylla ha Mawlai Mawroh ha kaba uwei ula khlad bad uwei ula mynsaw. Haba pynrem ia kane ka jingjia u Conrad ula ong, “Nga kwah ban tip shaki paidbah ka Jylla ba kino kino kiba donkti ha kane ka kam pyniap briew ba ki Pulit kin kem bad ka ain kan sa leh katkum ka ain”.

U Conrad ula pyntip baka Sorkar kala shim khia ia kane ka kam pyniap briew bad ula ong “Ka ain ka long kumjuh ia baroh bad kiba donkti kin ngat beit haka ain”.“Nga la iakren bad ka longïing ba shem lanot bad nga ai ka khubor sngewlem bad la ong iaki ba Phone sha nga lada ki donkam ha kano kano ka khep” la ong u Conrad.

 U Myntri Rangbah ula pyntip ruh ba ula bthah ia u Superintendent of Police (SP) ka East Khasi Hills ban leit jngoh iaka ïing ba shem lanot bad ban pynthikna ba kin ioh lut ki lad jingiarap. Haba iadei bad ka jinglong jingman, u Conrad ula ong “Nga la bthah ia u Director General of Police (DGP) ka Jylla ba un lum ka jingialang bad ki Bor District khamtam ha Shillong ban khmih bad ban bishar bniah naka bynta ban pynthikna ba ka shongsuk shong shngain kan iai neh”.

U la pyntip ruh ba lada ka i donkam, ka Sorkar Jylla kan pan shuh shuh ki bor pahara naka Sorkar Pdeng.“Nga kular shaki paidbah ka Jylla ba kim dei ban artatien namar ka Sorkar ka shimkhia ban pynneh ia ka shong suk shong shngain” ula ong.